حابب بس أوضح كام نقطة أو مقولة, بنستخدمها كتير بس يمكن علشان أحنا فهمنها بطريقة والناس بتفهمها بطريقة تانية أحب اوضحهم :
– أولا (الفرص بتبقي كتير وقت الأزمات)
الجملة حقيقية وطول ما في أزمات ومشاكل وطول ما في فرص, لكن محتاج يبقي عندك تعريف واضح للفرصة, علشان تقدر تقول علي حاجة فرصة لازم تكون
في الوقت المناسب
وانت تمتلك أدوات التنفيذ
وعندك الجاهزية, دي كده اسمها فرصة
غير كده اسمه حلم أو فرصة لغيرك, فبلاش تشتغل نفسك
تخيل انك معدي قصاد محل أرماني ولاقيت عرض علي بدلة 150 جنية لكن مقاسها 68 مثلا وانت مقاسك 50 ,فين الفرصة في الموضوع, لازم تنطبق شروط علشان نقول ان دي فرصة, ( وقت مناسب, امتلاك التكلفة,امتلاك الجاهزية).
– ثانياً (في الازمات والانهيارات تصنع الثروات)
صح جداً بس راجع التاريخ كله واعرف مين عما اللي قدروا يعملوا ثروة من الانهيارات الاقتصادية, وعندك قصة هنري فورد والكساد العظيم قدر يعمل ثروة, عندك وارن بافيت وشراء أسهم البورصة في الكساد وعمل ثروة, ادرسهم كويس وهتعرف ان العملية مش سهلة خالص وان لازم العقلية نفسها تكون اقتصادية بحتة وفي مهارات فردية وفروق كبيرة مش هتعرف تلمها في أسبوعين الازمة, ولازم يبقي عندك حجم معلومات تبني عليها رؤية للمستقبل وطبعاً قلب ميت ميعرفش يعني ايه خسارة, انت في بلد الناس لسه خايفة تحط فلوسها في البنك.
– ثالثاً ( المخاطرة بتحقق مكسب)
ومن غير ريسك مفيش رزق والكلام الحلو ده طبعاً صح لكن خارج إطار احتياجاتك الشخصية, انا بشتغل مع رجال اعمال ومستثمرين وعندهم القدرة ياخدوا الريسك لكن شغلي بقي اني ادرس الموضوع كله واعمل دراسة جدوي وأطلع نسبه الريسك كام وال ROI كام وفترة الاستثمار وفقاً للعائد وبعد كده بنقرر نيرسك ولا لااااااا, مفيش الفكرة اللي في خيالك دي, انت كده قالب علي حزلقوم يمكن لما اجرب اطلع بعرف
– رابعاً ( مفيش استثمار آمن )
أقسم بالله مفيش الكلمة دي انت لو نزلت اشتريت قرص جبنة رومي ممكن سعر السوق يتغير وتخسر فيه, لو اشتريت خضار من سوق العبور معدل اهلاكه سريع جداً في كام يوم وممكن تخسر, انت لو مبتعرفش تستثمر فأنت وحظك بقي ممكن تكسب او تخسر او تكسب وانت اصلا خسران بس مبتعرفش تحسب, الناس بتبص للعائد وبتنسي فترة الاستثمار والعائد علي الوقت وتكلفة الاستثمار ومعدل الاهلاك والتضخم ومعدلات النمو وليلة كبيرة اوي سعادتك.
– خامساً ( الحلول للافراد في الازمات )
مفيش يا باشا والله العظيم محدش مخبي عليك حاجة إقتصادياً بنقول للافراد في مراحل الانهيارات الاقتصادية والأزمات الكبيره حاول النجاه ليس الإ وبعدين لما يستقر الوضع نشوف هنعمل ايه, اذا كان الشركات لابسه في الحيطة وبنشوفلها حل, اقتصاد الدول لابس في الحيطة اللي جمبه, عايز انت توجد حلول لنفسك وتستثمر في الوقت ده, هدئ ساويرس اللي جواك واستهدي بالله كده .