عفريت الشهادة

عفريت الشهادة، صنم الختم، إله إعتراف المجتمع بيك
معظم الناس فى العادى بيترعبوا من فكرة إنهم يعملوا أو يبقوا حاجة أو يبقوا جزء من حاجة مش متصنفة من المجتمع
يعنى أى فكرة أو حدث أو كيان ملهوش إسم وصفة وعليه أراء واضحة وصريحة من المجتمع بتخاف تبقى فيه أو على علاقة بيه أو جزء منه

أى حاجة مش معتمدة من المجتمع فهى بالنسبالك ملهاش قيمة
أى كورس أو تدريب مش معتمد من المجتمع يبقى أى كلام
أى شركة أو تصرف أو فكرة أو هواية لسة مخدتش شهادة الجودة من المجتمع بتفضل طول الوقت بتتعامل على إنها حاجة ناقصة
بنفضل طول الوقت مستنين إعتماد المجتمع ليها عشان نتعامل معاها على إنها كيان وينفع نديله إهتمام، حتى لو كان الإهتمام ده إننا نشتغل على تخريبها

بس فى الأخر اللى بيعملوا فرق واللى بيبقوا حاجة واللى بيموتوا على الوضع اللى قرروه لنفسهم على مر التاريخ هما ناس مخدوش الختم ولا الشهادة من المجتمع
هما ناس إشتغلوا شهور وأيام متواصلة عشان يفهموا المعادلة صح وعشان يطبقوها وسط ظروفهم الصعبة ورغم التعنت والمقاومة

هما ناس مستنوش المجتمع يعتمدهم ويعتمد أفكارهم وطموحهم
ناس قرروا يختموا أفكارهم وإيمانهم ويدوا شهادة الجودة لمعتقداتهم بنفسهم وبشغلهم على الأرض ولسنين طويلة من المعافرة والكفاح

فى ناس بتستنى المجتمع يديها الشهادة وفيه ناس بتدى لمجتمعاتها شهادات.
الفرق فى الإيمان، الإيمان، الإيمان ومن بعديه طولة البال والنفس.

https://www.facebook.com/yahiakordy0/posts/1083630321688524