1- تزداد رغبة الشخص في لعب PES بعد ما يكون اتفرج على ماتش كورة مهم.
2- لو فرقته في الحقيقة خسرت بياخد نفس الفرقة ويجيب قدامها الخصم اللي كسب ويطبق وهو بيمرمطه.
3- الكورة في الحقيقة لعبة جماعية.. وكذلك في البلاي ستيشن.. ملهاش طعم لوحدك.
4- محلات البلاي ستيشن هي التطور الطبيعي للسايبر اللي كانت التطور الطبيعي لمحلات الفيديو جيم.
5- محلات البلاي ستيشن صاخبة كالديسكو، مليئة بالدخان كالغرزة، مظلمة كالأماكن المشبوهة بس هتبقى مبسوط.
6- قدرة الشخص في الحفاظ على تربيته بتتلاشى وهو بيلعب بلاي ستيشن وتلقائيًا بيلاقي نفسه بيشتم وبمرور الوقت بيكتشف تشكيلات جديدة من الشتائم من اللي حواليه.
7- اللي بيخسر دائمًا بيلاقي حجة.. الدراع تقيل، الدراع خفيف، الدراع نوره مش حلو، الحكم متحيز، النجيلة وحشة، الجمهور مش متفاعل، رمضان وقف على الكورة… إلخ.
8- فرحة الواحد إنه بيكسب ملهاش معنى بالنسبة له.. هو بيبقى فرحان إن صاحبه بيخسر ويتريق عليه.
9- علاقة اللي بيلاعبوا بعض زي علاقة جمهور الأهلي والزمالك بعد أي ماتش.. الخسران بيطلع القطط الفطسانة في الكسبان ويقول إنه كسب حظ وأجوانه كفته والكسبان بيألف أغاني على الخسران.
10- كل شلة ﻻزم يكون فيها نوع من الأنواع دي على الأقل.. اللي عنده بلاي ستيشن في البيت وقضى فترة من عمره يتعلم كل الحركات البهلوانية، اللي بيحب يلعب بفرق غريبة وهو مقتنع إن دي الحرفنة ويقول لك ريال مدريد مين أنا هاخد ليدز يونايتيد وابهدلك، اللي مالوش فيها حصالة المجموعة اللي الماتش بتاعه بيبقى فسحة للخصم، الشيطان اللي دائمًا عايز يلعب على فلوس، كابتن مدحت شلبي اللي بيحب يعيد الأجوان وده نصيحة ماتلعبش معاه.
11- كنوع من الاقتداء بمرتضى منصور فالأصدقاء بياخدوا لبعض سكرين شوت وخصوصًا لما يكسبوا بسكور ويفضل يعايروا بعض بيه تحت شعار “ملفاتك عندي”
12- اللي بيلعب PES بيتريق على FIFA ويقلل منها ويقول على اللي بيلعبوها إنهم مش حريفة.. الغريب إن ده نفس الكلام اللي بيقولوه اللي بيلعبوا FIFA على اللي بيلعبوا PES.
13- اللي بيحاسب وبعد كدة يلم الفلوس دائمًا بيدفع زيادة.. ده لو عرف أصلًا ياخد الفلوس من أصحابه.
14- زي ما الماتشات الحقيقية ليها استوديو تحليل فبرضه الPES ليها استوديو تحليل بيستمر بعد الخروج من المحل لفترة مش قليلة.
15- الثأر مش عادة صعيدية بس.. دي عادة عند اللي بيلعبوا PES. محدش بينسى هزيمته وبيعد الأيام علشان يرجع يقابل اللي كسبه علشان يهزمه ويمسح عاره.
https://www.facebook.com/5plushagat/photos/a.864666460287810.1073741828.860350430719413/930798603674595/?type=3