البوست ده مخصص لبعض طرق الجدال الغبية الأكثر شيوعا، اللي بتعكر لي دمي بقى لها سنين، ولسه هتعكره كتير لو فيه عمر.
1 – هي جات على دي؟
لما تقول على حاجة غلط، فحد يشاور لك على عشر غلطات تانيين ويقول لك “أنت يعني سيبت كل دول ومسكت في دي؟” إشمعنى دي اللي إتكلمت عنها؟” “ما فيه حاجات تانية غلط كتير”.
كون إن فيه أخطاء تانية، مايخليش الغلط صح.
ومش مطلوب مني أحصر وأغطي كل الأخطاء على وجه الكوكب أو في مجال أو شيء معين كل ما أحب أقول إن فيه حاجة غلط.
2 – إيه المشكلة يعني، ما ده بيحصل برة/ في أمريكا/ في كل حته/ من زمان.
على فكرة الرشوة مش عندنا بس، دي في كل حتة..على فكرة الواسطة مش هنا بس، ده فيه واسطة في ألمانيا..على فكرة الرجالة مش بتتحرش هنا بس، ده فيه تحرش في السويد..على فكرة سيطرة رأس المال دي مش دلوقتي بس دي من آلاف السنين.
وغلط في كل حته، وفي ألمانيا والسويد ومن آلاف السنين.
شيوع الخطأ مش معناه إنه مش خطأ.
وشيوع الخطأ في بلد متقدم عنك أو في وسط متعلم عنك أو في مجتمع أرقى منك، مش معناه إنه مش خطأ برضه.
3- التعميم
إن حد يوصل لإستنتاج شامل زي “كل الرجالة خاينين” ويفضل يعد لك حالات بتدعم ده.
فيبعت لك بوستات لستات بيشتكوا من خيانة أزواجهم، وفيديوهات لممثلين بيعترفوا بالخيانة، ويحكي لك قصص ناس يعرفهم بتدعم ده.
ومهما قولت له إن ده جزء مش كل، مافبش فايده.
شخص عايز يعيش في الواقع اللي هو شايفه صح، وياخد بس اللي يدعمه، وبيرفض كل اللي مابيدعموش، وهيرفض دايما أي محاولة للأخذ بالصورة الكاملة أو اللجوء لتحكيم التجربة العلمية أو المنطق.
4 – الحصان المتغمي
الحاج أحمد بيتبرع بفلوس للجامع، وبيعامل اللي بيشتغلوا معاه كويس وبيغرق أطفال في الترعة.
تقول له أنت إن الحاج أحمد راجل مجرم، يقول لك حرام عليك ده راجل كويس…تقول ياعم ده بيغرق أطفال في الترعه..يقول ده هو اللي دفع فلوس جواز الوله عماد الغلبان..تقول له يا عم بيمسك أطفال ويغطسهم في الترعة لغاية ما يقطعوا النفس..يقول لك يا عم بس والله أمير وبيدي علاوات للعمال اللي عنده، وعالج البت كوثر على حسابة.
5 – أنا اللي لاقيت الإفيه
الشخص اللي بيفتكر إنه “كسب” الargument وأثبت وجهة نظرة لأنه إنتزع ضحكه من الناس، حتى لو منطقة غلط. وعادة بيبقى فيها نوع من التريقة والbullying.
فمثلا تقول إن الدولة لازم تعامل كل الناس بعدل ومساواه بغض النظر عن العرق أو الدين أو الميول الجنسبة، فيقوم قايل لك “طبعا أنت حارقك قوي موضوع الميول الجنسية دي..هاهاااااي”..ويضحك كام واحد من اللي واقفين، ويبقى هو كده خلاص شبح وعلم عليك، وهو ساقط منطق.
6 – نسيب الكلام ونمسك في اللي قاله.
الأفكار لازم تقف على رجليها هي، سواء اللي قالها مؤمن أو كافر، بتحبه أو بتكرهه، تاريخه أسود ولا أبيض…إختلافك مع شخص مابيثبتش خطأ كلامة، زي ما إتفاقك معاه مابيثبتش صحته.
7 – “أنا بحب الكلاب” ..”أنت ليه بتكره القطط؟!”
الشخص اللي مابيهاجمش كلامك، إنما بيلبسك كلام تاني ماقلتوش، ويهاجمه كأنك قولته!
أنا بحب الستات الطوال مش معناها أنا بكره الستات القصيرين…أنا مش مقتنع بالرأس مالية، مش معناها أنا شيوعي، أنا مابفكرش في الجواز مش معناها إني شايف إن اللي إتجوزا غلطانين.
8 – تقدر تثبت إن كلامي غلط؟..يبقى كلامي صح.
معظم الإدعاءات في الدنيا لا يمكن إثبات خطأها بشكل قاطع يمكن عرضه قدام الناس.
مش معنى إني مش قادر أثبت بالدليل القاطع إن مافيش فرع لماكدونالدز في أي كوكب تاني من كواكب الكون، إن يبقى فيه!
أنا ماعرفش العلبة فيها إيه..بس هو 99.99% مش فيل.
9 – يا عم زهقتونا بقى بالموضوع ده، ما تشوفوا لكم حاجه جديدة.
وجهة نظر عمري ما هفهمها في حياتي، ومش فاهم إزاي فيه ناس فعليا بتستخدمها في الجدال..وهي إن الحقيقة اللي أنت يتقولها دي قديمة ومكررة فماتنفعش!!
يعني أنا المفروض ألاقي طريقة جديدة وكرييتف كل يوم عشان أقول لك بيها إن الشمس بتشرق من الشرق، وإلا أبقى زهقت معاليك وتبقى معلومه غير صحيحة؟
10 – منه فيه.
كل الكلام اللي الشيخ بيقوله صح….مين قال لك كده؟.!..الشيخ هو اللي قال لي كده.