رمضان و القرصنة

بمناسبة اننا في رمضان ، حأحكي لكم حكاية عن رمضان و القرصنة

في عام ١٩٩٦ شركة RDI نزلت اسطوانات عليها فيديوهات عليها التفسير الكامل للقرأن للشيخ الشعراوي يرحمه الله

الشركة كانت دافعة مبلغ محترم لشركة صوت القاهرة للصوتيات و المرئيات ، المالك الحصري لحقوق الفيديوهات دي

و علشان RDI تحمي الأسطوانات عملوا نظام حماية ضد النسخ و القرصنة

بس طبعاً احنا عارفين أولاد الحلال اللي بيحبوا عمل الخير كسروا الحماية دي و نزلوا الأسطوانات منسوخة بدون حماية

كان سعر المجموعة الكاملة من ٦ اسطوانات ٥٠٠ جنيه

بعد ما اولاد الحلال كسروا التشفير ، شركة RDI و تجنباً للخسارة المتوقعة ، راحوا عاملين حاجة اسمها Price Protection يعني نزلوا السعر ل ١٠٠ جنيه فقط ، لأن وقتها كان سعر الأسطوانة الخام ٢٠ جنيه و بالتالي لو حد حب ينسخ الأسطوانات كان حيدفع اسطوانات فقط ١٢٠ جنيه

انت متخيل ان في ناس كان عندها الأيمان القوي لدرجة انهم عايزين يسرقوا تفسير القرأن نفسه ؟

و انا متخيل لو ده ايامنا كنا حنلاقي بوست علي الفيسبوك بيقول

بمناسبة شهر رمضان المعظم ، المجموعة الكاملة لتفسير الشعراوي، حمل من اللينك التالي و ادعي لنا !!!!

شعب متدين بطبعه فعلاً