انا مقتنع ان الغباء بيتناسب طردياً مع السعادة ..كل ما هتبقي اغبي كل ما مشاكلك هتنزل لليفيل متطلباتك ..ولو مشاكلك دي اتحلت ..خلاص بتبقي اسعد شخص في العالم.
وكل ما تبقي اذكي بتبتدي تشوف الـvoid …اللي مهما حدفت فيها مسببات سعادة من بتاعت الاغبيا..بتفضل حفرة كبيرة سودا ….اقعد بقي ارمي فيها اكل وشرب وجنس وعيال وبيوت وفلوس ..ولا اي حاجة ..عشان انت بتدور علي سبب مش وسيلة …
اتجوز بقي اللي بتحبها وخلف ٣ عيال ونط برضه علي اي حد تاني وكل واشرب وعيش في بيت احسن وودي امك تحج …وفي الآخر هتكتشف ان كل ده متطلبات حيوانية وروحانية …لكن عقلك في البلاعة ..ولا انت عارف عايش ليه ولا الناس هتفتكرك ليه ولا انت وجودك افاد ايه.
كل ده تمام ومتصالح معاه ..لكن مؤخراً بقيت احس اني شخص شرير لأني بكره السعادة لأنها بتاخد معايا المعادلة بالراجع فا بكتشف مدي غباء وبساطة اللي أدامي ….
يعني قريب كنت مع حد حياته بيرفيكت …وقاعد كدة وبيحكيلي عن مغامراته بقي وسنينه ..وبعدين بيتكلم عن مطعم راحه هو وخطيبته وبيكلمني عن نوع سوشي….
وسحلني معاه ..والواد سعيد وهو بيتكلم عن كل عناصر القصة ..خطيبته والسوشي والشيف والأكل …الموضوع كان سعيد لدرجة اني دخلت في باد تريب والكلام بقي سلو موشن ودماغي عمالة تقول :
يانهار اسود طب ليه …ليه اليوم كله في محل سوشي …ازاي مستحمل نفسك ده انت فاضي! …انت مجوّف! ..ازاي ممكن تضيع يوم مفيهوش لحظة واحدة self-doubt او اي ضلمة …مفكرتش في حاجة؟ انت بتموت اصلاً كل دقيقة جسمك بيموت والوقت ضيق والدنيا عذاب وبيتضحك عليك من كله ..في شركة ماسكة حياتنا كلها ..الشركة دي ملونة وش خطيبتك وملبساها الفستان ..وعاملة محل السوشي ! ..احنا كبشرية مخطوفين!!
وخارج مع خطيبته يجربوا محل سوشي جديد في اخر الدنيا….في خطوة الانسان ممكن ياخدها زيادة في حياته عشان الجنس؟..حب وخطب وبيفسح وبيشتري ..وعشان ايه؟ …ده الجواز ده كله اصلاً الانسان البدائي الانسكيور اخترعه عشان الست متخونوش وعشان المجتمع بتاع البدائيين محدش يخطف مراته ..فا اخترع حرمة الجواز.
وبعدين قعدت اقول ايه القرف ده انت ليه بتفكر كدة مش يمكن دي السعادة وهو مبسوط؟ مش يمكن انت اللي خلاص وشك في الطينة ..سيب الناس تتبسط….
لأ لأ هو غبي ومبسوط …هو احسن مني …لأ انا اذكي …مين قالك انك اذكي؟
المهم يعني اني قربت اتجنن ..ومش فاهم فعلاً هو انا شرير؟ ولا فعلاً مبقيتش افهم انواع السعادة المين ستريم دي؟ ..
ومين بياكل سوشي في رمضان ؟ …اعتقد ان هو غبي فعلاً مش اكتر …ربنا يسعده كمان وكمان.
https://www.facebook.com/amr.sugar/posts/1937396406294605