حوار جواز صالونات

= دي أول مرة تتقدم لواحدة ؟
– كجواز صالونات زي اللي احنا فيه ده ؟ .. آه أول مرة
= يعني ليك تجارب فاشلة سابقة ؟
– أكيد
= وقررت الاسستلام والخضوع لأعراف المجتمع المتعارف عليها ؟
– كان last option ووصلتله
= وشايف انك عادي تيجي تتقدم لواحدة زيي مفيش بيننا اي معرفة سابقة وبدون ما تعرفني ولا تفهم شخصيتي ؟
– ما لو فهمتها هكرهك
= ملول ؟
– جدا
= زي حالاتي يعني
– عارف
= منين ؟
– Stalking
= من زمان ؟
– اسبوع
= واسبوع كافي بالنسبالك انك تاخد القرار وتيجي تتقدملي ؟
– ك صالونات آه
= وايه اللي شدك ليه ؟
– ظاهريات .. شكل وجسم .. ظواهر العقل والشخصية من خلال بوستاتك وشيراتك .. لايكاتك وقايمة الفولونج بيقولوا انك لحد ما تمام بالنسبالي
= يبقي انا من حقي اعمل المثل
– حقك
= انت شكلا وجسما مش المفضل بالنسبالي
– حقك برضه
= بس الراجل مش بشكله
– مظبوط
= الراجل بجيبه
– ده تفكيرك في المطلق ؟
= لا في الصالونات .. مهو last option بالنسبالي برضه.. طالما تنازلت عن قصة الحب واختيار القلوب .. يبقي حقي أدور علي المكاسب والمظاهر
– أكيد
= ف ايه أخبار جيبك ؟
– معقول .. مناسب .. هنعيش كويس
= في مستوي ؟
– متوسط
= شقة تمليك ؟
– اه بس بقسط
= عربية ؟
– اه بس بقسط
= صحتك كويسة ؟
– اه بس بسقط
= يبقي بالنسبالي تمام
– بتعرفي ترقصي ؟
= نعم ؟
– حقي اختار كمالياتي اللي محتاجها
= بعرف اه
– أقدر أتأكد ؟
= بعد الجواز
– ما هبقي لبست
= لو انا البنت اللي بتحبها من زمان..كنت هتبقي مهتم بالكماليات دي ؟
– لا الحب بيخليك تتغاضي عن اللي مش ع مزاجك
= يبقي اعتبر نفسك بتحبني وتغاضي
– منا لو الشخص اللي بتحبيه من زمان كنتي هتتغاضي عن الشقة والعربية وجيبي وصحتي وهتحبي تبقي معايا حتي لو ع حصيرة
= دا لو بقي
– منتي لو بقي برضه
= مبعرفش ارقص
– ولا بتشكلي ؟
= ولا بخمس
– طب دبكة لبناني ؟
= ولا تحطيب صعيدي .. ولا اي حاجة فيها مجهود .. ومتعجزنيش عشان مردهاش
– وريني
= تقدر تشيلني ؟
– كام كيلو ؟
= ٧٠
– هعتبر نفسي بحبك وهتغاضي عن الرقص
= هعتبر نفسي بحبك وهتغاضي عن الشيل
– كارهة للفرهدة ؟
= عاشقة لقاعده البيت
– موفي نايتس ؟
= وبطيخ ساقع وتسالي
– نتخطب سنه ؟ ارتباط شرعي .. اتفاهمنا نكمل
= متفاهمناش نفركش
– بدون تلقيح ؟
= و بدون تأبيح
– اندهي أبوكي نخلص
= باباااااا ؟

المصدر