الجمله دي سمعتها كام مره ؟
بيع كتير واكسب قليل تبيع اكتر
خد بالك ان المقوله دي وسيله مش هدف في حد ذاته
وسيله في انتشار البيزنس والمنتج بتاعك
واختراق السوق او اختراق اسواق جديده
للاستحواذ على شريحه كبيره من جمهور معين
والمقوله دي سبب في تدني المنافسه في السوق وانحصارها في المنافسه السعريه لما الناس اعتبرتها هدف … انت هتقلل الاسعار وانا هقلل اكتر منك وتبقى سلطه
وليه هي وسيله مش هدف ؟
بيقولك بيع كتير واكسب قليل تبيع اكتر
انت عامل بيزنس علشان تكسب اكتر مش علشان تبيع اكتر ؟ ممكن جدا لما تبيع اكتر تكسب اقل !!
لما تكسب في الوحده / الاوردر / البيعه اكتر ده هيخليك تقدر تعمل دعايه افضل تجيب موظفين افضل / تقدم خدمه افضل
ده كان ملخص كلامي مع حد بقاله سنين بيعمل عدد مبيعات يوميه متواضعه والمكاسب ضعيفه جدا ولما كلمته في سياسته التسعيريه لقيته بيقولي اصل انا ماشي بمبدأ “بيع كتير واكسب قليل تبيع اكتر”
قولتله والمبدأ ده وصلك لفين ؟
وهو انت كده بقيت بتبيع كتير !!
بقالك سنين بتعمل تقريبا نفس عدد الاوردرات !!
البيزنس هو نشاط هادف للربح
البيزنس يعني فلوس وارقام وارباح
غير كده يبقى مؤسسه خيريه غير هادفه للربح
اكسب اكتر وبيع اكتر وانجح اكتر والا هتفضل تعاني وتحدياتك في البيزنس كل يوم هتكتر
مقالب في البيزنس