ما يصحش تروح المنطقة دي

سبع خطوبات يتفشكلوا وطلاقين، لا يا عم أنا كده ماليش بخت في الجواز.. أنا قفلت الباب ده..

ما اشتغلتش في مكان واستريحت، عشان كده مش هاشتغل عند حد تاني.. أنا قفلت الباب ده..

شاركت في تلات مشاريع، اللي نصب عليا واللي خسرنا بعض واللي قفل.. ماليش أنا في الشراكة.. أنا قفلت الباب ده..

من بعد ما اكتشفت ان أعز أصحابي هو اللي مطلع عليا الكلام ده وانا خلاص ما عنديش ثقة في حد.. لا قريب ولا غريب.. أنا قفلت الباب ده..

ده اسمه استسلام.. باكلمك بالأمانة..

مش تعب.. مش حكمة.. مش عزلة حميدة.. ده اسمه استسلام..

ا س ت س ل ا م

وما يصحش تروح المنطقة دي..

حصل لك ايه يعني في المواقف دي؟ اتصدمت؟ عانيت؟ اتبهدلت؟ خسرت؟ ايه الجديد؟ ما هو ده جزء من “لقد خلقنا الإنسان في كبد”..

من وقت ما وعينا ع الدنيا.. لأ.. من ساعة مولدنا حتى والكَبَد شغال.. فراقنا للمكان الآمن اللي فضلنا فيه تسع شهور آكلين نايمين عاملين مش مطلوب مننا نشيل هم أي حاجة خالص إلى الدنيا اللي أول حاجة نعملها فيها اننا نبكي.. نجوع يبقى لازم نبكي.. نتضايق نبكي.. نعمل نبكي.. ما بقاش فبه حاجة ببلاش..

ايه الجديد؟! السعي والمعافرة مستمرين من وقتها.. والمطلوب مننا في حالات عدم التوفيق اننا ما نتعقدش..

مطلوب مننا نتعلم.. ن ت ع ل م.. نتعلم مرتين:

مرة من الإخفاق عشان ما نكونش دفعنا تمن ع الفاضي ويكون لتجاربنا قيمة..

ومرة اننا نتعلم أصلا.. نتعلم الحاجة اللي داخلين عليها.. نتعلم ازاي نختار صح.. ازاي نتعامل صح.. ايه حقوقنا.. ايه واجباتنا..

ومن التعلم ده والتعلم ده وبعد توفيق ربنا تجاربنا هتكون قابلة للنجاح أكتر.. وهنكون عرفنا احنا مناسبين في ايه اكتر من ايه.. وسعينا هيكون في الاتجاه الصح..

اوعى تستسلم.. انت مش مخلوق للاستسلام..

المصدر