التصنيفات
مقالات الضيوف

النجاح فين بقى؟

انا عندي مش عارف كام وعشرين/تلاتين سنة، هو انا عملت ايه في حياتي؟ هو انا هنجح امتى؟ ولا انا فاشل؟

مفيش قاعدة ثابتة للنجاح.. يعني مفيش حاجة اسمهالو عملت كذا وكذا وكذا انت اكيد هتنجح.

لكن الموجود ان في قواعد للفشل في حاجات لو عملتها انت بالتأكيد هتفشل، يعني مثلا لو ماحافظتش على الاستمرارية انت اكيد هتفشل. -دا معناه انك لو استمريت تعمل اللي بتعمله هتنجح؟ ممكن جدا، لكن مش مضمون، ممكن تعيش وتموت مستمر في اللي بتعمله وماتنجحش. ساعتها هيبقى الكنز في الرحلة بقه ههه -اسف-.

لكن النجاح صعب. ولو كان ليه قواعد ثابته كان كل الناس نجحت، واصلا ‘ النجاح ‘ نفسه نسبي. اللي شخص بيعتبره نجاح ممكن شخص تاني يعتبره حاجة عادية، وممكن شخص تالت يعتبره فشل.

ابسط مثال في الدنيا. لو جبت ٥١٪؜ في الثانوية العامة.

انت في نظر ناس كتير وكل اللي جابوا ملاحق او سقطوا ..ناجح.
انت في نظر ناس كتير وكل اللي جايبين مجموع قريب منك .. عادي.
انت في نظر ناس كتير وكل اللي جايبين درجات عالية .. فاشل.

فكل واحد بيشوف النجاح من مطرح ماهو واقف،
لكن النجاح فين بقى؟ اختلف العلماء في الحتة ديه بقى

فلا تقسوا على نفسك في موضوع ‘ انا عندي مش عارف كام وعشرين/تلاتين سنة، هو انا عملت ايه في حياتي؟ هو انا هنجح امتى؟ ولا انا فاشل؟’ والأفكار اللذيذة دي.

لان الموضوع نسبي، فالاسهل انك حاول اتبسط باللي معاك وانت باصص على اللي تقدر تعمله وتحققه قدام. لكن ماتقعدش تبص لورا وانا ضاع من عمري كام سنة والكلام دا لان وانت بتفكر في دا بيضيع من عمرك تاني فافيد لك انك تفكر لقدام بس.

المصدر