هو أخبار المترو ايه؟ الناس تأقلمت واستسلمت ؟!
طب الناس اللي كانوا بيدبرو 2 جنيه بالعافية دبرو ال 3 و 5 و 7 جنيه من أين؟
والناس اللي اعتقلوهم في المترو علشان اعترضوا خروجهم ولا لسة! وخرجوا مذلولين و ولا خدوهم بس علشان يهدوا الدنيا وبعدين سابوهم من غير مايهينوهم كالعادة! ولا ماخرجوش أصلا ولبسوهم تهمة من ليستة تهم الإرهاب بتاعتهم؟ !
هل فيه أي حلول شغالة عليها الحكومة لرفع مستوى الدخول والمرتبات الحقيقية اللي هي القوة الشرائية مش مجرد زيادة شهر 7 اللي مش هتغطي التضخم اللي وصل ل36 %السنة اللي فاتت ! فهل فيه رفع المرتبات والمعاشات اللي هتكفي الغلبان أكل ومواصلات في الشهر! مش طمعانين والله لو المرتب هيكفي في الشهر أكل ومواصلات أسرة مش مشكلة يستحملوا الغلابة مش هيتعبوا أن شاء الله ومش هيحتاجوا علاج وممكن مايدوش ولادهم المدارس أو مايخلفوش احسن علشان نستحمل كلنا سوا .المهم بس الحوكمة تطمنا انهم هيشتغلوا على موضوع المرتب علشان يغطي الأكل والمواصلات شهريا.
أنا بسأل بجد على حال الغلابة مش أكتر. وعارفة اني مافيش إجابة تطمني عليهم
عموما رمضان كريم وان شاءالله الجمعيات الخيرية هتسد من التبرعات وتساعد الغلابة. هتأكلهم وتشربهم وتعالجهم وتدربهم لسوق العمل وممكن نطلع فكرة جمعية كمان توفر مواصلات نقل مجانية للغير مقتدرين. هم المصريين كرماء أصلا واللي معاه مابيبخلش بيدفع الاتاوة اقصد الضرائب وبيتبرع للجمعيات والمستشفيات
أو يمكن ربنا يفرجها وإيردات قناة السويس تساعد في مشكلة المرتبات دي!
عايزة كمان أطمن على المياة، صحيح هي ساعات بتجيب أمراض ولسة فيه قرى ماوصلهاش المياة أصلا لحد دلوقتي بس أنا خايفة دلوقتي لنموت من العطش بعد كام سنة ومنلاقيش المياة !!
هل مجلس الشعب أو الحكومة أعلنوا عن خطة للسنين الجاية من توفير مصادر مياة بديلة زي مشاريع ضخمة لتحلية مياة البحر أو أي حلول بديلة؟ وهل فكروا النسبة اللي بنولد بيها كهرباء من المياة يكون ليها مصدر تاني زي الطاقة الشمسية مثلا؟ !! ولا كانت أفضل الحلول انهم يقللوا من زراعة محاصيل معينة زي الرز وقصب السكر وهيحبسوا الفلاح الغلبان اللي مش هيلتزم 6 شهور وبدفعوه غرامة !! طب ده لو الحل اللي هينقذنا ويحللنا مشكلة المياة. هل أعلنوا عن بدائل للفلاحين دي وهل فيه خطة لبدايل عن المحاصيل اللي هيقل إنتاجها؟ !!
عموما لو الموضوع كده اتحل ومشكلة مياة النيل بعد ما سد أثيوبيا يخلصوه مش هتأثر علينا يبقى نستحمل ونعديها ونشكر مجلس الشعب اللي بيفكر في مستقبلنا ومستقبل ولادنا وبيمثلنا بجد
انا برضه بسأل وعايزة أطمن مش اكتر فلو حد يعرف أن فيه خطة لحلول بديلة شغالين الحكومة عليها لحل المشكلة دي يطمني ولو مكتمين عليها يبعتلي انبوكس يطمني بس مش اكتر وربنا يطمن قلوبكم
https://www.facebook.com/asmaa.m.noureldin/posts/10155684574109001