إفهم قواعد السوق علشان متبقاش متعلم واهبل
القاعدة : المشهور بيكسب اكثر من صاحب القيمة الحقيقية.
قيمة المكسب الشخصي بتحدد وفقًا لقيمة التأثير * عدد الوصول ومعدل الاسترداد، ده الكلام العلمي.
أقولهالك بالعامية :
مكسب كل انسان بيقدم خدمة أو منتج ايا كان بتحسب بطريقة عدد الناس اللي ممكن الشخص ده يأثر فيهم ويخليهم يدفعوا فلوس 
شوفت البساطة
الامثله بقي علشان نفهم :
ميسي بيكسب أكثر من دولة الارجنتين كلها والسبب ان الارجنتين كدولة ملهاش التأثير علي عدد الناس في الكوكب زي قوة تاثير ميسي، فلو الارجنتين عملت حملة دعائية لمنتج عدد الناس اللي هتشتري ٢٠ الف مثلا لكن ميسي هيخلي ٢٠٠ مليون علي الأقل يشتروا… فهمت
الدكتور العالم العظيم ممكن يعمل ندوة أو كورس يقول فيها اسرار الكون في الغالب بعد عمليات تسويق خرافية ممكن يحضر ٢٠ الف لكن ببساطة شديدة ممكن إيمينيم يعمل حفلة يحضر فيها ٢ مليون وفي ٢ مليون زيهم ملقوش تذاكر و٢ مليون معهمش فلوس وحاسين بالحسرة و ٢٠٠ مليون بيتابعوا الحفلة لايف علي اليتيوب، فمن الطبيعي والمنطقي ان إيمينيم يكسب اكثر من الحاصل علي جائزة نوبل.
في الاقتصاد السلوكي اكتشفوا ان الانسان اذا امتلك المال الكافي هيصرف ٣٠٪ علي احتياجاته الاساسية و ١٠٪ علي التعليم والتطوير و ٦٠٪ علي الترفية لان الانسان هدفه الاسمي في الحياة هو الحصول علي المتعة وتجنب الآلم.
وبالتالي مينفعش تقارن نفسك ب ٢ ماجستير و ٤ دكتوراه بحمو بيكا ولا ويجز لان ببساطة مستوي تأثيرك لا يتعدي ٣٪ من تأثير الناس دي، لو حضرتك تلاحظ ان في الامثلة في بوست استخدمت لاعب كرة عالمي ومغني عالمي علشان اطمنك ان المشكلةمش في مصر ولا احنا دول عالم ثالث ولا نقدر العلم والكلام الاهبل ده، امريكا والمانيا واليابان بيقدروا العلم ومقدمين الترفيهية بيكسبوا اكثر من اكبر العلماء في العالم.
حتي لو عملت اختراع ينقذ البشرية ويغير العالم
للاسف يا صديقي حتي ولو عملت كده مش هتكسب زيهم، حتي ولو اخترعت الانسولين في النهاية ان بتأثر في فئة محددة فقط وهما مرضي السكر وبالتالي المكاسب محددة ومكلفة والانسولين يعتبر منتج أضطراري فقط.
لو حضرتك ماشي في الشارع مع اصدقائك ممكن تلاقي مول فتح جديد فتدخل تتفرج فيلم نزل فتدخل السينما ، ملاهي جديدة فتدخل تلعب، لكن مستحيل تدخل الصيدلية تشوف عندهم أدوية ايه جديدة نزلت السوق
فلو كانت نيتك في العلم والتعلم وترك الآثر الذي يفيد الناس هي الدنيا فصباح الفل
اما لو كانت نيتك لله خالصة فما عند الله خيرًا وابقي.