مشهد فيلم الكيف لما جميل راتب بيقول ليحيي الفخراني :
زمــان كنت بغش الشاي بنشـارة خشب وابيعه في بواكي.. شكلهـا حلو مكتوب عليها شاي “أبو الأصـول”.. كسبت والمـاركة بقالها اسم وسَمَّعِت.. وفجـأة.. النشـارة غليت والنجارين اتملعنوا.. عبينـا الشاي من غير نِشـارة.. تعرف حصـل إيه؟.. اتخرب بيتي وفَلِست.. الزبـاين طفشت وقالوا عليـا غشيت الشاي.. مش باقولك مغفليـن!
رد عليه يحيي الفخراني وقاله
– هم مش مغفلين.. اللي زيك اللي فسدوا ذوقهم.. عودتوهم على الوِحِـش لغاية ما نسيوا طعم الحلو
علي الرغم من الفيلم قديم لكن المشهد ده بيلخص الوضع الحالي
اي حد بيحاول يفتح شركة في مصر او يضيف قيمة باي شكل من الاشكال لازم يبقي مقتنع تماما ان الناس نسيوا طعم الحلو .. بطلوا يشجعوا اللي بيضيف قيمة … بيتفاعلوا بسرعة وبشكل رهيب مع اي هري ومحن بيظهر قدامهم..عندهم ذاكرة سمك وبينسوا الحاجات الحلوة بسرعة
لو معندكش استعداد تتعامل مع الوضع كما هو – لفترة طويلة – وفر علي نفسك المشوار
علي الجانب الاخر ..لو بتقدم اي حاجة…حتي لو هري صرف…حتي لو الناس كلها بتنشرها علشان تتريق عليها..بس انت استمريت علي كده لفترة ٣ سنين هاتقدر تنجح لان ببساطة الناس هاتتعود عليك ..والامثلة في الموضوع ده ملهاش حصر