الحمد لله عالليل الطويل إللي مَاكَانش عايز يعدِّي لما مَاكانش معاك تَمَن بُكرَه،الحمد لله عالنهار القُصير الكئيب لما ماكانش عندك سقف يشيل عنك لسعة شمسُه،الحمد لله عالتوهَه إللي عرَّفِتَك قيمة اللُقا،الحمد لله عاليومين الفَقر إللي خلوهوم يُقفوا جنبك ودَوَّقوك طعم الجدعَنه،الحمد لله عالوِحدَه إللي علِّمِتَك تتبسط بعِزوِتَك،الحمد لله عالغُربَه إللي عرَّفِتَك قيمة الواقفه تحت البيت،الحمد لله عالأهل إللي حِنيِّتهُم عرَّفِتَك الرحمه باليتيم،الحمد لله عالأهل اإللي تقصيرهم علِّمَك ماتقساش على ولادك حتى لو لسه مَجوش،الحمد لله عالكِتف إللي وقَّعَك على جُدور رقبتك لما سندت عليه ومن ساعتها وإنت جدع منشِّف كتفك للي يسند علشان عِرفت وجَع وقعِتها،الحمد لله عالناس الغلط إللي جولك في الوقت الصح عالأقل عرفت إن لسه فيه وقت صح بس عينك بقِت في وسط راسك،الحمد لله عالناس الصح إللي جت في الوقت الغلط وعرفوك إن لسه الدنيا بخير ومشيوا،الحمد لله على وجع القلب إللي طَلَّعك من تِعداد إللي معندهمش قلب عشان يتوجع،الحمد لله على مُفتَرقات الطرق إللي خلتك حافظ شوارعها بالرصيف،الحمد لله على المعلقه الدهب إللي ماكانتش في بوقك لما إتولدت عشان لو كنت أول ماوعيت عالدنيا لقيت الدهب كان زمانك ساذج بتقول عالفضه بكل جمالها ده حتة حديدة،الحمد لله عاليوم إللي راح فيه كل إللي حيلتك وماموتش بعديها بس جربت فضيلة الإستغناء وإتأكدت إنك أدها وأدود،الحمد لله عالظنون إللي خابت والحمد لله عالنفوس إللي باعت والحمد لله عالصوره إللي مالِت بس طِلِعت منهم جَدع.
الحمد لله عليها هيَ والحمد لله عليه هوَ حتى لو مابقتوش لسه عند بعض وصَبَحتوا أغراب،حتى لو الميه نِشفِت وبقِت بديهي مستحيل ترجع لمجاريها،حتى لو الدنيا لِعبت لِعبِتها الرِزلَه،حتى لو سُخرية القدر حَصَلِت في أبشَع صُورها وسبتوا بعض ولسه إللي في القلب في القلب،كفايه الأرواح إللي إتشحنت علشان تقدر تكمل كمان شويه،كفايه إنك عرفت إن حتة اللحمه الحمرا إللي جواك لسه فيها الأمل،كفايه إن كل واحد ساب مكانه حته واسعه هتبهوق أوي على أي حد غيره عشان هو الوحيد إللي على مقاسها علِّمِتَك تحرَّم تبطَّل سايبها مفتوحه تاني عالبحري،كفايه شوية الوَنَس وسندة الضهر والروح إللي ردت بعد ماكانت صحرا في نص ليلها.
ألف الحمد لله عالحلو بس مليون الحمد لله عالوِحِش،لولا بذر العنب الكبير إللي بيبقى مُر لو قرقشته غصب عنك ده عارفه؟..ماكنتش هتتمتع بالعنب البناتي الصغير إللي بيتكبش كَبش وبيتزلط زَلط،لولا قرف الشغل ماكانش بقى إسمه ويك إند وبقيت تستناه من الإسبوع للإسبوع……..ليلتكم بتضحك.
https://www.facebook.com/hanyelfekii/posts/758738714316237