الاهتمام بالحسابات مش بسّ هينبّهك لو بتخسر
دا هينبّهك كمان لو بتكسب !!!
بمعنى
ممكن تكون بتكسب فعلا من المشروع بتاعك – لكنّك مش حاسس
ممكن تكون بتاخد من أرباح المشروع وتصرف على نفسك بشكل مبالغ فيه وبسبب عدم إمساكك بحسابات مظبوطة – تقوم تعتبر المشروع فاشل – فتقفله !!
بينما المشروع مربح ومجدي – إنتا اللي فاشل وسفيه في الإنفاق
المشروع ممكن يكون فيه بند بيكسب أكتر من التاني – إمساكك بالحسابات الدقيقة هيوضّح لك وهيرشدك توجّه استثماراتك فين بالظبط – بدل ما تصرف على البندين نفس المصاريف
المشروع ممكن يكون بيكسب – بسّ المشكلة عندك في التحصيل – دي مشكلتك إنتا – مش مشكلة المشروع
المشروع ممكن يكون بيكسب – بسّ حسابات التكاليف هتوضّح لك إنّك بتدفع إيجار زائد عن الطبيعيّ – بتدفع أجور مبالغ فيها
في جلسة استشاريّة مع أحد العملاء قال لي أنا مبيعاتي 3 مليون في الشهر – وأجور العمّال عندي 600 ألف في الشهر
فقلت له هنا مؤشّر واضح جدّا على وجود مشكلة في التكاليف – الطبيعيّ إنّ أكبر رقم لأجور العمّال في أيّ مشروع تكون أقلّ من 20 %
فبحسبة سريعة نقدر نقول إنّ حضرتك عندك زيادة غير مبرّرة في بند الأجور
إمساك الحسابات ممكن يوضّح لك إنّك بتكسب – فده يكون سبب في بدء اهتمامك ببنود كنت مش عاوز تصرف عليها – لإنّك كنت معتبر نفسك بتخسر وخايف تصرف مصاريف زيادة
فيتبيّن ليك إنّ فيه مكاسب حقيقيّة بتتحقّق – فتبدأ تصرف على إعلانات زيادة وانتا متطمّن – أو تفكّر في التصدير
إمساك الحسابات مش بسّ هيوضّح لك إنّك بتخسر – دا ممكن جدّا يوضّح لك إنّك بتكسب – ويوضّح لك سبب عدم شعورك بهذا المكسب
و ع الأقلّ – إمساكك بالحسابات لمّا يظهر لك إنّك بتكسب – هيخلّيك نفسيّا أحسن – فتقدر تاخد قرارات أفضل وأكثر اتّزانا