لو تابعت الاعلانات المصرية فترة ممكن تكتشف ان الشركات و وكالات الاعلان فى مصر تقريباً بتكسّل تدور على افكار جديدة للإعلان وبيشتغلوا بحاجة زى الtemplates كده. يعنى مثلاً لو:
– اعلان سمنة او زبدة، هنجيب الست الفلاحة اللى هنغمض عنيها وبعدين هتدوق من العلبتين اللى قدامها وهى مش عارفة الفرق، وطبعاً هتنبهر بطعم السمنة الفلاحى بتاعة الشركة.
– لو صابون او مسحوق غسيل.. فاطلع يابنى بتمبليت الواد اللى بيروح المدرسة وبيرجع متشلفطة ايده بالجراثيم وهدومه الجديدة بالشيكولاته وطبعاً الام بتحزن كأن محصولها غرق مثلاً وتفضل متكدرة لحد ما تلاقى الصابونة اللى بتشيل الجراثيم او المسحوق اللى بينضف الهدوم ويرجعها بيضا تانى.
– لو غسالة او بوتجاز، هنجيب الراجل اللى بيقعد يتخابث ويضحك فى التلفون ويعاكس فى حد كده، وطبعاً مراته قاعدة بتجسس وهتتخانق معاه بعد المكالمة وتطلب الطلاق، بس الحمدلله بتكتشف انه بيتكلم عن البوتجاز او التلاجة.
– لو قرية سياحية او كومباوند هنجيب ناس اجانب كده شعرهم اصفر وعينهم ملونة ومنعرفش جولنا البلد منين، وهيقعدوا فى الجنينة او قدام البحر فى استرخاء وسكينه.
– لو شيكولاتة او بسكوت او حاجات تتاكل فهنجيب اغنية مشهورة من التسعينات ونجيب شوية عيال نغنيها ونشيل شوية كلمات منها ونحط اسم المنتج.
– لو جيل او كريم شعر هنجيب الواد اللى بيحط المنتج من هنا ويقوم موقّع اى بنت فى البلد تقابله مغماً عليها بسبب ان شعره متثبت حلو.
* الجميل فى الtemplates دى انها مبتقدمش، يعنى هى هى من التسعينات لحد 2016 و مستمرة.
https://www.facebook.com/Marketerhossamhassaan/posts/10153864920370833