مينفعش تعمل حاجة لمجرد انك بتعملها حتي ولو بتحبها .. لازم يبقي في عنصر الاستمتاع ..عنصر الابداع
لو دول مش موجودين انت بقيت بتعمل نفس شغل “القطيع” بطريقة جديدة ..بس في الاخر النتيجة واحدة.
الناس هاتربط صورتك بالشغل اللي بتقول انك عملته / بالفلوس اللي بتكسبها / بطموحات ناس بطلوا يجروا ورا حلمهم / بنتائج ناس بتشتغل وبتنجح وهي كل يوم الصبح بتفكر متروحش الشغل
مينفعش تبقي زيهم ..ومينفعش تسيب نفسك ..لو لقيت نفسك بتتحول لواحد منهم ..اهرب
اهرب قبل ما تلتزم بمسؤليات تربط ..اجري ورا احلامك ..ارجع للنقطة اللي كنت فيها وقت ما ابتديت ..ارجع خفيف واتحرك بسرعة ..شيل اي مسؤلية من عليك علشان متحجمش افكارك
على قد طموحك واحلامك دى هاتواجه حجم العقبات المناسب لحجم احلامك
اكبر عقبة اي حد بيواجها حاليا هي كلام الناس ..كلنا بنكتب علي الـ Social Media سيبك من كلام الناس ..بس كلنا بنتأثر بيه ..
حاول متسمعلهمش …حاول تبعد عنهم .. علي قد ما تقدر ابعد عنهم
صدقني هاتستمتع بكل لحظة “هاتشتغل فيها” ..هاتلف وهاتستفاد خبرات كتييير ..هاتتعرف علي ناس جديدة ..هاتمر بمواقف اكتر .. هاتعيش بجد smile emoticon
الاحلام مش ببلاش
الثمن يا تختار تبقي قد حلمك وتواجه الاحباط من اهلك واصحابك ..
يا تبيعه وتاخد :
“مرتب ثابت +
اقتناع اهلك واصحابك بيك لحد سن معين وبعدها كلكوا هاتتأقلموا مع المرض اللي انتوا فيه +
(فرص) في الترقية”
الخوف هو اللي بيموت الاحلام .. مش الفشل
اكتر ناس عايشين حياتهم مبسوطين هما اللي بيعملوا اي حاجة عايزنها من غير مايفكروا في كلام الناس
اجمدوا يا شباب..هي الاحلام متنحة حبتين..بس هاتيجي هاتيجي.. هتروح فين
وما ذلك علي الله بعزيز