(إنت والأيام بتتحركوا بسرعة بعض)
في فئة من الناس بتتمني تسافر ..بس الموضوع طلع اكبر من اللي انت عارفه بكتير الموضوع اتكرر قدامي و سألت كذا حد من اللي بيسافروا كتير واغلبهم اكد الفكرة..
الفترة اللي جاية فكرة السفر نفسها هاتبقي اصعب من قبل كده
السفر من مصر “اجراءات الفيزا” بتاخد وقت وبيرخموا لمجرد الرخامة ..وفي واحد قدامي مرضوش يسفروه “لقطر” لمجرد انه مش معاه ورق بيقول انه مسافر شغل في مكان محدد ومطلعش ورقه من “مكتب في المطار” بتثبت كلامه
وبعض الدول بقت بترفض ناس انها تسافر ..بمعني انك ممكن تسافر وتترفض من الدولة اللي رايحها “حتي ولو الدولة مش محتاجة فيزا” ..مجرد انه هيسألك انت جاي تعمل ايه ..وانت متجاوبش اجابة مقنعة وتكون معاك ادلة زي حجز الفندق اللي هاتنزل فيه..ممكن تترفض وترجع علي نفس الطيارة اللي وصلت البلد فيها
دولة زي الامارات الفيزا بتاعتها “للزيارة” بيبقي مكتوب فيها
تمتع بزيارتك وغادر قبل انتهائها ليتم الترحيب بك “مرة اخري”
(الندوب دى تعلمك إمتى بكل رضا تضحى
الجرح كان عميق لما اللى إتجرح كان سطحى)
حاليا مصر ارض خصبة جدا للمشاكل والفشل والاحباط والظروف …والحجج والشماعات والكسل واليأس ..وكل اللي عايز تقوله
حاجتين لو معملتهمش “هاتتحبس في مكانك باقي عمرك ..بغض النظر عن الوضع هايتحسن او لا ..قرار انك تبقي قادر تسافر مش هايبقي ملكك من غيرهم
١- اللغة: الانجليزي بقي شيء اساسي ..بعض الدول العربية شرح المحاضرات ومحادثات المؤتمرات ..حتي كلام العمال في المطار كله انجليزي .. في الصين الاشخاص الكبار في السن مبيعرفوش انجليزي ..بس اي شاب “سنه صغير”الانجليزي بيبقي ممتاز عنده ..فانت محتاج انجليزي بشكل عام ..ويفضل كمان لو قدرت تتعلم لغة البلد اللي هتسافرلها ..دا هايديك فرصة افضل
٢- لازم ..لازم ..لازم تبقي متمكن من “حرفة معينة او مهارة في حاجة محددة” ..في مصر الموضوع بيمشي بالحب بس ..مش محتاج اكتر من واسطة ..خارج مصر الموضوع مختلف ..الواسطة ممكن تخلك تسبق دور ..تاخد حاجة ازيد شوية ..بس مش هاتديك دور انت مش مؤهل ليه ..دا لو افترضنا انك عرفت تجيب واسطة خارج مصر
(حقيقة كل حاجة فى كل حاجة … تكافؤ فرص
الحيوان بيفيد ويستفيد بالفطرة والتجربة)
كلامي ملوش علاقة بانك هاتقعد هنا او تسافر ..كلامي موجه انك لو مش متمكن من مهارة ومفيش عندك لغة ..هاتقضي باقي عمرك بتشتم وتسب وتعلن في مكان انت محبوس فيه ..وللعلم ..في ناس مستمتعة بكده فعلا بغض النظر هي واعية بالموضوع ولا لا… وموضوعنا هياخد وقت ، هياخد وقت طويل
(خليك إتفرج ، يمكن تفهم حاجة فى مرة
ولا تفسدها ، ولا تفسدك ، ولا زى كل ضئيل تتمرد
إستمر فى السقوط حتى لحظة الإصطدام)