التصنيفات
مقالات الضيوف

هو انت “دماغك”بتشتغل ازاي؟

في الشغل، او حتي في السوبر ماركت وانت بتشتري جبنة او صابون

اكتشفت ان دماغي بتشتغل بنفس الطريقة اللي بتشتغل بيها جوا الشغل في معظم جوانب الحياة.

ومعظم جوانب الحياة دا كمل معايا للسوبر ماركت،
يعني من اول القرارات اللي ليها علاقه بالشركة
وانا وظيفتي فعلا “CEO” لحد ما انا نازل اجيب صابون وجبن.
هقولك ازاي:
يعني اكتشفت اني لما ببص على سعر اي حاجة مش ببص على سعر الحاجة بس، ببص على السعر والكمية وتاريخ الصلاحية في حالة ان حاجه عليها اوفر.
وتاريخ الصلاحية مش مهم ان هو دلوقتي مش خلصان، لا.
المهم ان هل هو هينتهى والحاجة لسه انا بستخدمها ولا هكون خلصتها؟ ودا طبعا بحساب متوسط استهلاكي انا ومراتي.

فمثلا، احيانا كتير عزيزتي السنيورة عزيزي المتزوج هتلاقي عروض على الجبنة الكيري، في كل وقت وفي الغالب في كل مكان.
انا مش بلاقي سعر المغري واشتري، لا
انا بشوف كل العروض على كل الاحجام المختلفة
“من اول ٦ قطع لحد ٢٤ ولا مش عارف كاف”
واقسم السعر على عدد القطع فيطلعلي سعر القطعة الواحدة
ملاحظة مهمة جدا:
مش دايما سعر القطعة في الغلبة الكبيرة ارخص من العلب الصغيرة” وان كان بقى السعر الارخص في العلبة الكبيرة فعلا،
هو ارخص باد ايه في القطعة الواحدة،
لانه ممكن يبقي ” ٥ قروش ” مثلا وساعتها انت مضطر تاخد حاجة فاضل على انتهاءها شهرين وانت بالفعل مش هتقدر تخلصها
“فتاكل منها علشان تخلصها ”
ودا معناه انك مش هتتبسط بيها،
فيبقى الاحسن انك تاخد الاصغر منها او الاصغر منها تاني،
علشان تاكل لما تبقى عايز تتاكل وتتبسط

ولسه من كام يوم كنت بجيب صابون:
فلقيت نوع مصري سعره رخيص،
بس في نوع تاني انجليزي معرفوش بس ريحته حلوة،
وفي الغالب هيبقى جامد “وطلع جامد جدا زي ما توقعت ”
سعره مكتوب غالي بس دا كان ٦٠٠ مل ودا كان ٢٠٠ مل
فلما قسمت السعر على الحجم طلع ان النوع الانجليزي ” اللي شكله احلى وواضح انه انضف وافضل ” في الحقيقة ارخص.
” سعر الملل هنا اقل من هنا ” والصابون صلاحيته ٣ سنين وبنستخدمه كل يوم وكتير، فاشتريت النوع الانجليزي.
وهكذا بقى

انا كاتب الكلام دا ليه؟
١-اولا نصيحة لست البيت، ان دايما وانتي بتشتري ما تحبيش على متغير واحد ” السعر ” احسبي بشكل دقيق
طلعي الاله الحاسبة في موبايلك ” اقسمي السعر على الحجم ” ودخلي موعد انتهاء الصلاحية في المعادلة قبل ما تشتري اي اوفر على اي مواد غذائية ” انتي عارفه متوسط استهلاك اسرتك”

٢-وهو الاهم البوست دا اجابة على سؤال كذا حد يساله لي “حتى الناس اللي شغالين معايا نفسهم” لما يلاقيني قاعد في الشغل معظم الوقت مش بعمل حاجة فيقولي ” هو انت بتعمل ايه؟ ”
فانت لو شفتني في السوبر ماركت هتلاقيني واقف قدام الرف دقيقتين ببص عليه و”مش بعمل حاجة” وبعدين هامد ايدي واسحب منتج معين.
بالنسبة لك انا ماعملتش حاجة لكن في الواقع ان بعمل حاجات مينتل بدماغي 😃
فانا بعمل كده في السوبر ماركت وانا بشتري جبنة وصابون،
فممكن تتخيل بقى انا بعمل ايه في الشركة اللي اصلا بتديني الفلوس اللي بجيب بيها الجبنة والصابون

المصدر