تكون مبتسم كل مرة تقابل العيلة والأصحاب والجيران، وتكون بتاخد وتدي في الكلام، وماتبقاش كشر وماتبقاش غتت.
مش لطيف إنك تفقد أعصابك، أو إنك تزعق..مش لطيف إنك تعمل مناظر..مش لطيف إنك تكون حزين وضارب لنا بوز..ماحدش عايز مشاكلك والسلبية بتاعتك..كلنا عندنا مشاكل وبنداريها…ماتحط مشاكلك تحت السجادة يا أخي..إدفنها، خبيها، خش أوضتك أو الحمام وعيط لوحدك..طلع غضبك في بوكسات في الحيطة أو قطع في جلدك، أنت حر…بس لو قطعت جلدك إبقى قطع في الحتت اللي الهدوم بتغطيها، ماحدش عنده وقت للدراما بتاعتك.
شكوتك مملة…شكوتك مكررة…شكوتك عندي أكتر منها، ولو تجرأت وقولتها، كل اللي هعمله هو إني أعلي عليها، ونبقى إتنين بنشتكي لبعض من غير ما نسمع بعض.
أرجوك عاني في صمت..معاناتك سخيفة..وبتضيع لي وقتي وبتغير لي مودي.
روح لدكتور…إكتب يومياتك..إتصرف..لكن ماتزعجنيش.
وماتبينليش مشاعرك إلا لو إيجابية..الضيق والحزن والغضب والعصبية حاجات مش المفروض تبان..مشاعر غير لائقة..الإنسان المتحضر اللطيف مايصحش يسيبهم يظهروا.
إكتم مشاعرك لغاية ما تعيا…زينا كلنا..إكبت نفسك لغاية ما نفسيتك تتحطم تماما، مش مهم، أصل النفسية مابتبانش..المهم من برة تكون لطيف.
https://www.facebook.com/mostafa.m.helmy/posts/10156074352706084