مرحلة الانفصام في الشخصية

انا فعلياً بتمنى هزيمة منتخب مصر في بطولة افريقيا في كل ماتشاته وبنتايج كبيرة .. بفضل متمني ده جداً لحد ال٩٠ دقيقة بتوع الماتش لو اتفرجت .. بتفرج بقلب مشجع عادي واتفاعل مع كل كورة وافرح بالاجوان وكده عادي .. يخلص الماتش ازعل لو كسبنا وافرح لو خسرنا ..

حالة نموذجية لانفصام الشخصية .. انفصام سببه ان منتخب مصر في اصله بيمثل الدولة المصرية اللي هي عبارة عن شعب ونظام سياسي بيحكمه وانا بكره الاتنين من كل قلبي .. التمثيل ده بيبرز في جمل وان كانت صغيرة لكنها حقيقية زي “فوز مصر انهاردة هيكون فوز بطعم سياسي” و “زي ما قال الريس منتخب مصر كويس” ..

الحالة دي بتتغير مع صفارة بداية المباراة علشان ده بيبقى فريق كورة بحبه وفيه لاعيبه بحبهم جداً .. وبترجع مع صفارة النهاية عشان منتخب مصر زي اي حاجة في مصر مليان فساد ووسايط ومجاملات ومحسوبية و و و ..

والحقيقة ان ده مش حالي لوحدي ولا بيحصل بس في ماتشات افريقيا .. احنا بنتريق على لبس بعثة الاولمبياد بس بنشجع اللاعيبة .. بنفرح باخبار فشل محاولات الحكومة والنظام في المحافل الدولية بس بنفرح بالانجازات الفردية او الجماعية لو حصلت ..

مصر باللي بتعمله فينا في سنين عمرنا وصلتنا لمرحلة الانفصام في الشخصية .. وقريباً هندخل على مرحلة الجنان التام وهنمشي نكلم نفسنا وان كان البعض وصل للمرحلة دي فعلاً ..

مصر اللي قتلت وحبست انضف ولادها وظلمت ملايين عامدةً متعمدة مع سبق الاصرار والترصد في كل محافظاتها وقراها ونجوعها هي هي مصر اللي بنشجعها ونهتفلها ونفرحلها ونصرخ باسمها في اوقات زي الماتشات كده ..

ياريت محدش ينتظر مني تفسير لسبب اللي وصلتله ده عشان الاسباب اوضح من الشمس .. ولا سبب اللي بيحصل في ال٩٠ دقيقة عشان مش هينفع نمنطق الخلل العقلي اللي وصلناله ده ..

https://www.facebook.com/muhammadsayedrashad/posts/10158120539270707