الموضوع ده كان عمل لي ازمة في حياتي , اكون بتخانق مع حد و فجأه تحصلي حاجة معرفش ارد , لكن يا دوب هو يمشي و الموقف يخلص , أقعد أنا بقي ابدع مع نفسي و الاقي مليون رد كنت ممكن أقوله !!! بس ليه ؟!! ليه ساعات كتير بنحس أن ” دماغنا مش حاضره ” ؟!
الموضوع بيبتدي من ساعة ما الانسان بيتعلم الحوار اصلا , و يتربي علي فكرة النقاش نفسها .. فمثلا بتتربي أن لما حد يسألك ” عامل ايه ” يبقي الرد من غير تفكير ” الحمد لله كويس ” , فبتجمع شوية أكلشيهات او أستمبات للردود في قاموس تفكيرك .. و القاموس ده بيتملي علي مدار حياتك بالردود السريعة ..
أما ساعة الموقف الجديد عليك او مثلا النقاش المفاجئ , فأنتا لسه قاموسك مش تقيل في الجزء ده , او بمعني أصح الكلام هنا مش زي ” أنتا عامل ايه ” الرد معروف ,,, و عشان كدة بنلاقي بعض الاشخاص اللي بترد بسرعة او زي ما بيتقال ” بتاخد حقها ” بالكلام , و السبب ببساطه ان دول عدوا علي مواقف مشابهه او حاجات قريبة لكدة .. أما ناس تانية لأ ..
و عشان عقلك ميخلكش تمر بالموقف ده تاني , بيقعد يبدع معاك بعد ما الموقف يخلص و يجيبه يمين و شمال و يقولك انتا كنت ممكن ترد كدة و هو يرد كدة , و تفضل تعمل سيناريوهات ياما في مخك .. و ده بيبان اوي في لحظات الفراق بتاعة الأحبة و خصوصا لما تبقي لاول مره بالنسبة للشخص , فبعد انتهاء الموقف يقعد يقول ” انا كنت ممكن اقول كدة ” أو ” ليه مردتش كدة ” و السبب ببساطة ان ساعتها عقلك بيكون عاوز يملي قاموس الأكلشيهات ..
فعملية استحضار الرد مش عملية سهلة و خصوصا لما يكون لسه العقل بيبدع فيها و بيظبطها , اما لو حاجة كدة كدة محفوظة او متعارف عليها فبتبقي اي كلام .. و بتطلع في ساعتها .. فحتي لو عقلك فضل يأنبك انك معرفتش ترد ساعتها عشان يعلمك و يطور منك , فبلاش انتا كمان تقسو علي نفسك و تعاملها بتقليل لإن الموضوع بيجي مع الوقت و كترة المواقف مش أكتر …
https://www.facebook.com/Kirolos.bahgat.creativity/posts/10211776239667862