من أسئلة ال ASK
ليه دايما الست بتفكر إنه أي واحد بيكلمها كصديقة يبقى بعد شوية هيحبها وهيتجوزها.. مهو قال إنهم أصدقاء يبقى معليهوش لوم؟
____________
أنا هقولك ليه يا سيدي بتحصل الإشكالية دي (وبتحصل مع الرجالة كمان بس أنا هنا هجاوب عليك كراجل).. وخلينا نتفق إنه الكلام موجه لناس معندهمش مشكلة أساسا في الصداقة بين الجنسين..
بيكون أساس العلاقة صداقة ده المعلن إللي بيقوله الراجل في البداية لكن التصرفات بعد شوية بتقول غير كدة.. مثال: يقولها إحنا أصدقاء/ أو ما بقولش حاجة خالص.. وبعدين يكلمها كل يوم بالساعتين ثم يبدأ يغير، ثم يبطل كلام عن الستات اللي في حياته، ثم يعلق على لبسها، ثم يعاكسها ويغازلها، ثم يكلمها بسهتنة الساعة اتنين بالليل (والكلام ده بيجيب الستات سكة. هو إحنا ربنا خلقنا بنحب السهوكة.. الأغلبية) وبعد ما يعمل الattitude ده ست شهور وتتعلق بيه كراجل مش كصديق يقولها أنا قايلك إننا أصحاب.. وشكرا بتكون حبته خلاص وعايزة تتجوزه
? (عريس يابوي)
ده غير بقى الرجالة (والستات) الحريفة بشكل فطري في الصيد إللي بشكل لا واعي بيمارسوا أسلوب الشد والجذب٠٠ الضرب والملاقية..الديلرز، إللي بيدوا جرعات الاهتمام والحب بالجرام زي الهيروين ويعرفوا إمتى يعلوا الجرعة وإمتى يقللوها وإمتى يسحبوها بالأيام.. ويرجعوا يزودوها تاني وهكذا. وده بيدخل الشخص التاني في حالة إدمان علاقاتي حرفيا..
والحل : سواء ست أو راجل طالما أصحاب أو زملا وفيه هبل ابتدا يحصل لازم ننزل بجملة تفيد معنى (مالك ياض ما تظبط- مالك يا بت ما تظبطي)
طيب قلنا كدة والطرف الثاني ابتدا يبقى سوما العاشق في نفسه وداخل في طور المحن؟.. ده يتقال له وش كدة حرفيا “وبعدين… وآخرتها.. إحنا رايحين فين”؟ علشان لو مش فايق وعايش اليوفوريا على أفانا يفوق ويهدى ويرتكز كدة..
مرة صديق قاللي: مع أول وحشتيني مسهتنة بعد الساعة اتناشر صباحا الست تبدأ تشوف مسمى للعلاقة… عايزة تسميها تسلية، باك بوني، flirtationship براحتها هي وشوقها .. بس تقف الوقفة مع نفسها ومحدش يقرطس حد….
على فكرة إنه الواحد يقول للناس كلام (زي احنا أصدقاء) وتصرفاته ولغة جسمه بتقول غير كدة، دي أحد مسببات القلق النفسي double messaging/ double bind.. بيحذروا من ده حتى في التربية لما الطفل بيسأل أبوه إللي -كل لغة جسده بتقول إنه شايط- بابا إنت زعلان فالأب يبتسم ويقول له أنا مبسوط يا حبيبي مش متضايق.
دكتور محمد طه استشاري الطب النفسي ومؤلف كتاب علاقات خطرة بيقول إنه الإنسان الناضج المفروض يكون عنده الوعي الكافي إنه يتحمل مسئولية المشاعر اللي بيثيرها في الآخرين. وده بنتعمله في حاجة زي البرمحة اللغوية العصبية إللي بتورينا إنه الألفاظ إللي بنختارها في الكلام مع تون الصوت مع لغة الجسد ليهم دور في توصيل الرسائل للآخرين وإحنا المفروض نتعلم نعمل ده. بإختصار إحنا علينا مسئولية. نستجدع ونكبر ونشيلها
ستيف هارفي مؤلف كتاب Act like a lady think like a man بيقول إنه في خلال علاقات صداقات الراجل والست الراجل غالبا في مرحلة ما هيبقى عايز ياخد العلاقة في إتجاه تاني لكن إللي بيوقفه الحدود إللي الست مديهاله ( مالك ياض ما تظبط
?) وببقول جربي اعرضي على أصدقاءك الرجالة dating بلطف، الأغلب هيقولوا يلا بينا.. (وماله حد يرفص النعمة برجله) 
? وإجابة على سؤالك لو أخدنا كلام ستيف هارفي في الحسبان هتلاقي إنه معظم الرجالة في علاقات صداقاتهم بالستات هيحاولوا في مرحلة ما يحوروا شكل العلاقة والحدود هتوقفهم..
أحد أسباب المشكلة دي برضه إنه الناس ساعات بيكون عندها خوف نفسي من إنها تحط حدود علشان بيخافوا من الفقد. يعني الست أو الراجل بيكون خايف يفقد الطرف التاني إللي معتبره صديق أو يزعله فما بيعرفش يعمل المواجهة اللازمة عند اللزوم لما بنحتاج نأكد على إطار العلاقة..
وفي الجزئية دي برشح بالإضافة لكتاب علاقات خطرة، كتاب صحة العلاقات لدكتور أوسم وصفي..
الكلام ده لطيف ومفيد للناس إللي لسة ع البر.. الملطوطين إللي اتعودوا عالشمة خلاص، ليهم بوست تاني…
هي نيلة وحلت على دماغنا?
*أنا عارفة إنه الروح الرمضانية مسيطرة.. بس البوست زي ما انتوا شايفين خفيف وفكاهي وأنا رايقة وده شئ لو تعلمون نادر فوحياة سيدكم اللبلوبي ما تقلبوها مناقشة دينية.. لكل مقام مقال
#ست_وراجل
#علاقات
#البسكوتة_والدحلاب
https://www.facebook.com/shaymaa.elgammal/posts/10155770254898090