التصنيفات
مقالات الضيوف

في فرق فظيع بين حاجة بنحبها و حاجة صح

دا أغلب اللي بنحبه بيكون مش هو الصح

في فرق فظيع بين حاجة بنحبها و حاجة صح .. ده بالعكس ، أغلب اللي بنحبه بيكون مش هو الصح ،،، بداية بأكل الشوارع و الصودا و الشكولاتات ، مرورا بتقضية الوقت الفاضي من غير اي انتاج او هدف ، حتي الأصحاب او الناس المقربين لينا مش بنختارهم عشان دول بيفيدونا في حياتنا علي قد ما بيضحكونا او بنبقي مبسوطين في القاعدة معاهم … علي مدار حياتنا بيكون الصح دايما هو الرخم او الصعب ، بيكون هو الدوا المر او الأختيار الأبعد .. و يمكن ده اللي بيخلينا نخلط بين المفاهيم و نبرر لنفسنا ان اي حاجة بنحبها هي الصح و ده قمة الكذب و الغش علي الذات !!
بس اعتقد الشخص الناضج هو اللي يعرف يفرق ،، و حتي و هو بيختار اللي بيحبه يكون بيختاره عشان بيحبه من غير ما يكدب علي نفسه او يزوق في الغلط .. لا أنا حأكل أكل بمعمول بزيت عرابيات او حواوشي غالبا لحمة كلاب مش عشان ده صح و لا اللي المفروض يحصل بس انا حاعمل كدة عشان طمعها حلوة .. انا حاضيع وقتي و اتسرمح مع اصحابي الصيع مش عشان انا بأثور علي التعليم الفاشل او عندي خطة تانية ، لأ انا كائن فاشل بس مبسوط بفشلي مع اني عارف انه غلط .. أنا في العلاقة الغلط ديه مع الشخص الغلط ده عشان انا بأحبه ، أنا مصدقه ، أنا مبسوط معاه ! مع انه غلط و اللي حيجي منها غلط بس انا متحمل توابع الغلط ده …
خلينا نكون واضحين مع روحنا و صادقين مع عقولنا .. خلينا نكون علي قدر كافي من المسؤولية و النضوج اننا نقرر قرارات لمجرد اننا بنحبها او بنبسط فيها .. مش عيب او حرام اننا نغلط أو يكون اختيارنا ضد الصح العام او المجتمعي مادام بواعينا و مش بنأذي غيرنا .. أنما التفاهة و الحقارة أننا نعيش في وهم المثالية و الصح المطلق عشان احنا أضعف من اننا نواجه نفسنا بالحقيقة او أجبن من مصارحة نفسنا بالواقع

https://www.facebook.com/Kirolos.bahgat.creativity/posts/10216809438174679