التصنيفات
مقالات الضيوف

عيّنة بسيطة من اللى احنا حاسين بيه كلّنا

متضايق يا دكتور
مكتئب يا دكتور
مش عاوز أشوف حد
باتحرك بالعافية
قرفت من كل حاجة و نفسي مسدودة
زهقت من الناس و بافكر أخلص من حياتى و أخلّص اللى حواليا منّى
كلهم باعونى…
الدنيا بقت وحشة جدا
عاجز يا دكتور و حيلتى اتعدمت
مهدوووود و جسمى تعبان و مصدّع طول الوقت
مش انا بتاع زمان..انا مش انا
الدنيا كلّها عليّا
مش عارف آخد قرار واحد فى حياتى
مظلوم و حاسس بكسرة القلب و القهر
قلقان على طول من الصغيرة قبل الكبيرة
مهموووووووووم و حزييييييين و شايف الستاير السودة فى كلّ حتة
ماعنديش لا إنجاز و لا عمل و لا راض عن نفسي و متضايق منها و عاوز اخنقها
ماعدش عندى إحساس إن فيه حاجة بتبهجنى زى زمان
الرجالة كلّهم أوغاد…..
الستات كلهم نكديين…….
أى مسؤولية و لو صغيرة بابقى شايل همّها و باهرب منها…
ثقتى فى نفسي معدومة و ماحدش بيحترمنى……
هو انا ليه كده؟…..ليه مش عارف اعمل حاجة…..
نفسي اطلع بره بيت أبى و أمى و احس بالحرية….
هو إمتى اطلع بره البلد و اروح بلاد بره !!!!!
ما بقتش قادر استحمل حاجة و بقيت حسّاس و ضعيف و هشّ….
هو ربنا هيتوب علينا إمتى من اللى إحنا فيه؟
هو ربنا مش شايف بيحصلنا إيه و تجبّر الظالمين فى الأرض؟!!!
هو إزاى أنا تعبان كده و انا الكبير؟ أنا القوى؟ أنا اللى ما كنتش باتهدّ خالص؟!!!
مش عارف أحدد مستقبلي و ضايع…!!!!!!
مش مسامح نفسي ….
ماعنديش إنجاز واحد أفخر بيه قدام نفسي…..

طيّب يا أصدقائي الأحباب….ديه عيّنة بسيطة من اللى احنا حاسين بيه كلّنا….و كلمة كلّنا هنا ممكن تريحك شوية …مش علشان إن غيرك تعبان زيّك…لأن الكلام اللى فوق ده كلّه بيحصلّنا كلّنا…و اتحدى واحد بس يطلع يقوللى أنا ماحستش بإحساس واحد منهم فى ساعة و لا يوم و لا شهر و لا سنة…مافيش يا جماعة……
أنا بس عاوز أقول ما تضايقش نفسك أكتر إنك تعبان و متضايق….الحياة نفسها تميل كثيرا إلى الماديّة و ربنا سبحانه و تعالى عارف إن الحياة الماديّة ما بتبسطش قوى اللى قلبه حىّ…و انت قلبك حىّ علشان كده متضايق و حاسس بميكس من الأحاسيس اللى فوق….
أول خطوة تعملها لإدارة و أقول لإدارة مش لإنهاء مجموعة الأحاسيس السلبية اللى فوق إنّك ما تزعلش من نفسك و لا تموّتها…ده قرار….بعد القرار ده فيه كلام يتعمل….معايا؟ يتعمل مش نفكّر فيه و لا نتشات عليه و لا نقراه كتير…باقول يتعمل…..
بس علشان يتعمل لازم تفضي شوية لنفسك اللى صاحبتها مانتش قرفان منها و تستعين بالقوة العظمى فى الكون اللى هى ربك و ربّى….و تطلّع مجموعة الأفكار و المفاهيم اللى جايباك ورا و تحطها قدامك على الترابيزة و تشوف إيه فيها يترمى فى سلّة القمامة و إيه فيها تظبّطه و تعدّله…لازم تكتب العادات و السلوكيات و المشاعر اللى خلتك متضايق من نفسك و تشوفلها صرفة.. لازم..و إلا هتشكّل أحمال ترجعك تانى لورا….مش لازم أغيرها 100% بس على الأقل أكون واع بيها و عارفها و ابتدى أشوف هابدأ بإيه…..لوحدك…مع كوتش…مع صديق يعلم الطريق..اللى انت شايفه…..هتقع تانى…ما يجراش حاجة….مانت عندك زرعة فيها جذور مش سهل اقتلاعها مرة واحدة….ما تزعلش….عدّيها…و كمّل…..طلّع بتغييرك بعض التفكيرات و بعض السلوكيات انتصارات صغيووورة خالص كان نفسك فيها….يا فى روحانياتك يا فى علاقاتك يا فى جسمك و صحتك و مهنتك النافعة يا فى علمك و نفعك للناس و دراستك الهادفة يا فى أى مجال انت حابّه ….صغيورة مش كبيرة…بس بسرعة….تفكير واحد و سلوك واحد يتغير طلّع بيه إنجاز كان نفسك فيه يفرّحك من نفسك….
هتلاقيك عرفت التيتة و مانتش مخضوض…و بعدها تكمّل مسيرة حياتك بعد لما تكون شلت أحمال من على كتفك ….تبقي ناجح نافع فى جزء صغير من الحياة و يفتقدك من فى هذا الجزء حينما تغيب فتشعر بقيمة ما فعلت و ربنا يرضى عنّى و عنكوا…….
و رمضان بيدق الباب و بيقول…ياللا بينا….

https://www.facebook.com/khaled.elhaddad.5/posts/10153464722335706?__mref=message