عيالكم مش ملككم يا جماعة

يعني بجد مش هتقتحمي عليه الأوضة وتجبيله صرع ؟ ولو قالك خبطي يا ماما مش هتقوليله انا أمك وأعمل اللي يعجبني ! .. بجد يعني هو انسان مستقل وله خصوصية رغم صغر سنه ولازم تستأذني قبل ما تدخلي عليه ؟ .

******

مشهد في فيلم if i stay
لما الأم بتقول لبنتها .. اللي المفروض تختار بين السفر لولاية تانية عشان تدرس الحاجة اللي بتحلم بيها وبين البقاء بجانب حبيبها ..
الأم بتقولها :
whatever your decission is I support youu ..

يعني مش هتقوليها دراستك أهم من الشخص اللي بتحبيه مثلا ؟ .. ولا هتضغطي عليها تعمل الحاجة اللي انتي شيفاها صح ؟ هتسبيها تقرر وتختار ، وكمان هتدعميها ! يا سبحان الله ..

******

مشهد تالت من فيلم stuck in love ..

لما الإبن دخل على أبوه ف لقاه بيفتش في دفتر كان بيكتب فيه notes ..
الواد قعد يزعق ويقول لأبوه : .. dad I trusted you and you promised you’ll never read my notes !
الأب مقعدش يقوله انا ابوك ومفروض أكون عارف عنك كل حاجة ، وانت خايف من إيه ؟ ايه اللي انت كاتبه ومينفعش أنا أعرفه !
لا دا قعد يعتذرله ويقوله ان اللي حصل دا كان غصب عنه .. وكمان رد عليه وقاله : I am worried about you .. you don’t have secrets .. get out and have some experiences ..
يعني هو مضايق ان ابنه من البيت للمدرسه ومن المدرسة للبيت .. وشايفها مش حاجة ايجابية .. مضايق ان ابنه مش بيخرج للدنيا وبيعمل خبرات .. مضايق ان ابنه معندوش أسرار يخبيها عليه ! ف دا معناه ان حياته فاضية ومفهاش إثارة .. مش بيقعد ويحط رجل على رجل ويقول الواد ابني من الجامع للبيت للمدرسه ربنا يحميه ! .. عارف ان دي مش حاجة تبسط .. فاهم يعني ايه حياة .. ويعني ايه الشخص لازم يعيشها fully ..
وان مش شطارة ان حياتك تكون واضحة وهادية وفاضية ومملة ..

*****

عيالكم مش ملككم يا جماعة .. مفيش حاجة اسمها تعرفوا عنهم كل حاجة وكل تفصيله .. مفيش حاجة اسمها تقتحموا خصوصياتهم وحياتهم بحجة انكم امهم وابوهم .. مفيش حاجة اسمها تقرروا ليهم .. وتغضبوا عليهم لو مسمعوش كلامكم ومنفذوش قراراتكم .. مفيش حاجة اسمها تحجروا على ميولهم وتتوقعوا منهم ميغلطوش أبدا ويمشوا على الصح من وجهة نظركم .. مفيش حاجة اسمها ميكونش ليهم أسرار ولا خبرات ولا حياة مستقلة ومليانة بحاجات مش شرط تعرفوها كلها .. مفيش حاجة اسمها انت خايف من ايه ؟ ..
مش معنى انكم قررتوا انكم تجيبوا عيل انه بقا ملك لكم . هو انسان وله حياته واختياراته وأسراره .. وانتوا ليكم تدعموه وتقفوا جنبه وتحاولوا تحموه بس من غير ما تخنقوه وتضيقوا عليه .

https://www.facebook.com/00.00.01.AM/posts/1780651308916842