كنا مرة بندرس في كلية علوم مادة اسمها Energy Conversions علي ما اذكر ..كان بيدرسها لينا دكتور احمد جلال كان عميد الكلية وقتها طلب مننا assignment غريب ملوش علاقة بالكيمياء ولا الفيزياء..قالنا المرة الجاية دورولي علي أطول كلمة باللغة العربية واطول كلمة باللغة الإنجليزية..كان ساعتها لسه السمارت فونز مش منتشرة اوي..روحنا وجبنا الإجابة من جوجل في ثواني .
سألنا المحاضرة اللي بعدها خدتوا وقت اد ايه عشان تجيبوا الإجابة..كله اجمع أنه مخدناش اكتر من دقيقة.
قالنا واحنا في سنكم كان الموضوع هياخد اسبوع بحث مننا في المكتبة …عشان كده بنتوقع منكو تروحوا ابعد مننا. بكتير
فالاسبوع بتاع جيل الخمسينات بقي دقيقة في جيل التمانينات وهيبقي ثواني في جيل الالفية.
علم الانسان بالقلم…كلها معارف تراكمية .نعمة..مش نقمة باذن الله
حدوتة جميلة، بسيطة وملهمة، للناس الصغيرة اللي بتقعد تشتكي ان الجيل بتاعهم مظلوم ومحطوط عليه.
حاول – بس حاول – انك تفكر في الإمكانيات الموجودة في ايدك وماكنتش مع اللي قبلك، والقدرة دلوقتي على تنفيذ حاجات بالأدوات اللي ماكنتش موجودة قبل كدة.
التحديات اكيد اكبر دلوقتي، لكن التحديات قد الأمكانيات، والنتايج المطلوبة متناسبة مع المعطيات الموجودة برضه.
مافيش جيل محظوظ وجيل مظلوم، ما تقعدش تقارن نفسك وزمنك بأخوك الكبير وابوك وعمك، كل جيل عنده فرص قد المشاكل.
الحاجات المشتركة اللي ما اتغيرتش ولا هتتغير:
ان مش لازم اللي نفع مع غيرك ينفع معاك، خليك في نفسك.
ان على قد مجهودك وسعيك ربنا هيكرمك.
ان الرضا بالحال هوا اساس السعادة.
ان راس المال مش بس فلوس: وقتك، تنظيم حياتك، وتوظيف امكانياتك المتاحة صح اهم من الفلوس.
وان الصبر والاصرار والمعافرة مفاتيح كل الفرج.