طول عمري بكره الزغزغة. علشان ضحك بالعافية. رد فعل اجباري مرتبط بحاجات مالهاش علاقة بالمشاعر الداخلية كدة. بالظبط زي الدموع والبصل. ده غير اني عمري ما فهمت، ايه المضحك ونبي دلوقتي؟ وكان بالنسبالي الشخص اللي بيحب يزغزغ لعيال ده اكيد يا اما سمج، علشان فاهم ان مش هو اللي بيضحك، لكن مبسوط ان فيه ضحك وخلاص. يا اما بقي كسلان او فقير ابداعيا، مابيحكيش قصة لذيذة، ولا يلعب لعبة دمها خفيف، لا… بيزغزغ. اسهل واسرع.
وانا صغيرة، كنت بغير جدا، من كل حتة. وكنت بكره اللحظة اللي ييجي فيها حد كبير عني نسبيا ويقرر يلاعبني فيبتدي يزغزغني. كنت بكره تحديدا في اللعبة البايخة اللي توارثتها الاجيال دي، اني مهما قلت خلاص او كفاية او مابحبش الزغزغة، ومهما كنت جادة وصادقة في كلامي؛ اللي قدامي عمره ما هياخدني جد، لأني ببقي مكركعة ضحك…
بس انا بضحك علشان بتزغزغ، مش علشان مبسوطة. وانا اصلا مابحبش الزغزغة.
اهو انا حاسة ان ال كام سنة الأخيرة دول، بأحداثهم، بيزغزغوني في بطن رجلي.
https://www.facebook.com/menna.kiey/posts/10152663154279704