أحد أكبر مشاكلي الوجودية من وانا صغير في صلاة الجمعة هي فقرة الدعاء، عشان أسباب كتير أوي منها الدعاء علي الآخرين من نوعية “اللهم أهلك مش عارف مين، والله دمر مش عارف إيه واحرق وعذب” في إيه يا معلم؟ هو ربنا ده في خيالك كيان نفسه يهلك ده ويدمر ده؟ عصبي كده؟ أجريسيڤ بالشكل ده؟ مش بالنسبة لي أنا شخصيا علي الأقل، وكنت من وانا صغير بستغرب الشيخ وبفكر هو إنت ليه عصبي وبتتشنج كدة؟ وهو ربنا سبحانه وتعالي يعني هيهلك حد عشان انت قدمت السبت وقلت “اللهم”؟ ما زنقتوش إنت كدة علي فكرة، مش مضطر هو يُجيب دعائك الغريب العنيف ده ومش هيُجيبه.. بس ده برضه ماكانش السبب الأساسي.
دايما كنت بستغرب بشدة فقرة “اللهم أشفي مرضانا ومرضي المسلمين”.. ثانية واحدة بس.. طب وباقي المرضي يا معلم؟ دول يتحرقوا يعني؟ دول حتي مرضي يا أخي.. هو إنت مش قبل ما بتقرأ أي قرآن أو حتي تعمل أي حاجة بتقول بسم الله “الرحمن الرحيم”؟ ده تصورك لل”رحمن الرحيم”؟ إنه هيشفي حبايبك إنت ويسيب الباقي يولع؟ وليه إنت بتدعي بمبدأ يارب إشفينا احنا وافشخ الباقي كلهم؟ طب ما يشفي مرضانا ومرضاهم بما إن في شفاء هينزل! حبنا احنا واكره الباقيين كلهم؟ إنت شايف الكلام ده منطقي؟ مش حاسس بالجنون والobsession؟ قيسها حتي علي نفسك في علاقاتك؟ عمرك دخلت في علاقة مع واحدة أو دخلتي في علاقة مع واحد وحسيت إنك عايز الشخص ده يحبك ويكره باقي العالم كله؟ أنا شخصيا ببقي كده ساعات وحسيت إني مش سوي في تفكيري ده..
إنت مدرك إن مفيش شيخ أو داعية عنده ما يكفي من السماحة والحب أو حتي الشجاعة إنه يطلع يقول اللهم اشفي مرضانا ومرضي المسيحيين؟ اللهم أهدي اليهود؟ اللهم تقبل العمل الصالح من البوذيين؟ ليه شايف إن الباقي يستحق المرض ويستاهل الحرق وتتمناله العذاب؟
حتي لما حد بيأذي حد، شوف بيدعي عليه إزاي!
وهو ده السبب الأساسي إللي حرق دمي وخلاني أكتب الپوست ده بصراحة، إني شفت واحدة بتقول يارب إحرق قلب فلانة علي إبنها!! أه والله! وفاكرة عادي إن ربنا هيقولها حاضر ويحرق قلب إنسانة علي طفلها إللي ما أذاش الست الأساسية في حاجة!
هو ليه السواد الأعظم -وهو سواد فعلا- مؤمن إن عنده واسطة تعذيب وربنا ده بدلا من إله رحمن رحيم كيان وحشي مستني بس إشارة عشان يأذي حد؟ ده عندنا إحنا البشر بس، ممكن تكلم بطلجي ينزل يقفلك شارع، يعورلك حد، واخرته في السجن، عشان دي جريمة، إنتي حضرتك بقي بتدعي علي واحدة بجريمة تحصل في ابنها وبتطلبي ده من نفس الكيان إللي بتدعيه إنه يكون في أقصي درجات الرحمة والرقة والكرم معاكي.. طب إنتي حتي هتثقي فيه لو عمل فيها كدة؟ عايزك بس تتخيلي لو ربنا بيستجيب لهذا النوع الوحشي من الدعاء من واحدة دعت عليكي نفس الدعاء، متخيلة كان هيبقي ظالم قد إيه؟ بلاش، تخيلي إنه بيستجيب لهذا النوع من الدعاء من كل الناس، متخيلة كم الجثث والأشلاء إللي هيبقي طاير في كل حتة يمين وشمال؟ دي كانت تبقي مجزرة والمصحف.
كل إللي ممكن أقوله حاجة واحدة ووالله العظيم من غير ذرة أڤورة.. اللهم أشفي المرضي جميعا وتقبل صالح الأعمال من الناس جميعا وتغاضي عن سيئات الناس جميعا وإهدينا جميعا، كلنا بلا إستثناء، حتي وانا مؤمن بالجنة والنار بدعي ربنا إنه يدخلنا الجنة كلنا، ده دعاء، مش بفلوس، ده دعاء، تمني من ربنا، أمنية! بس علي الأقل كويسة، أعتقد يعني.
قصص الأنبياء فيها إللي بيدي عدوه خده التاني واللي قام احتراما لجنازة من أذاه وغيره، ما التسامح أهو يا بني أدمين يا ولاد ال.. ولا بلاش خليني كويس 
https://www.facebook.com/kareemsamara/posts/10154081925853106:31