التصنيفات
مقالات الضيوف

شخص بيعمل حاجة إنت أصلا نفسك تعملها ومش قادر فبتهاجمه

من الظواهر النفسية المنتشرة بين الناس إنك تهاجم شخص بيعمل حاجة إنت أصلا نفسك تعملها ومش قادر فبتهاجمه علشان مش قابل تشوف حد بيعرف يعمل إللي إنت خايف تعمله.
واحدة صاحبتي طلبت الطلاق علشان تتخلص من أذى نفسي كبير واقع عليها من ١٥ سنة وبعد فشل كل المحاولات للنجاة من الأذى.. مامتها طول الوقت كانت بتهاجمها وبتسمعها مر الكلام وقت الإنفصال..
بعد الطلاق، صاحبتي جالها عريس وحست إنها مياله ترتبط بيه.. ماماتها بدأت تهاجمها تاني وتصوت وتعيط
وقالت لها: أنا مكنتش عايزاكي تتطلقي علشان ما تتجوزيش تاني!
صاحبتي بتقولها وفيها إيه ده حقي..
مامتها قالتها اشمعنى أنا استحملت قرف أبوكي وشتيمته وضربه ليا السنين دي كلها.. ما كنتي تستحملي زيي..
وهنا كل شئ بان في المواجهة دي.. إللي كان متخزن في العقل اللاواعي طلع!
الدرس المستفاد: فيه ناس كتير هتهاجمك علشان مش قادرين يشوفوك بتعمل إللي ما عرفوش يعملوه.
بإختصار.. بيدفعوك تمن فشلهم هما! عايزينك فاشل زيهم علشان نجاحك بيوجعهم.. بيفكرهم بفشلهم
لما تلاقي نفسك بتهاجم حد بشكل غير مبرر في حاجة ما تخصكش.. أو غيرك ييهاجمك بشراسة علشان حاجة ما تخصوش .. فكر كويس في الدافع بتاعه
ممكن هتشوف حاجات انت مش شايفها
#النفسية_بعافية

https://www.facebook.com/shaymaa.elgammal/posts/10155806106388090