بحبك، تتجوزيني؟ اتجوزك، يشرفني يا عمي أطلب ايد بنتك، إحنا بنشتري راجل، مبروك، نقرا الفاتحة، سمعونا زغروطة، يا دبلة الخطوبة عقبالنا كلنا ونبني طوبة طوبة في عش حبنا، الفرح الخميس الجاي، والعاقبة عندكم في المسرات، شيك شاك شوك، ياي ياي ياي يا سهر الليالي، مبروك المدام حامل، كل يوم فرخة، خلي بالك من نفسِك ومتشليش حاجة تقيلة، أنا بولد يا وليد، اتنفسي يا سهير، ألف مبروك، ولد يتربى في عزك، يارب يا ربنا يكبر ويبقى قدنا، اسمع كلام أمك متسمعش كلام أبوك، قول ماما، قول بابا، تاتا تاتا خطي العتبة، اصحى يا حبيبي المدرسة، ابن خالتك أحسن منك فيه؟ لو كل صحابك نطوا من فوق الكوبري هتنط وراهم؟ اتعب في المدرسة وبكرة تستريح، اتعب في الجامعة وبكرة تستريح، اتعب في الشغل وبكرة تستريح، شايف نفسك فين بعد خمس سنين؟ شايف البحر شو كبير؟ بحبك يا آمال، بحلم بيك أنا بحلم بيك، أهواك واتمنى لو انساك، تتجوزيني يا آمال؟ جالي عريس جاي من الخليج، جبار، في رقته جبار في قسوته جبار خدعتني ضحكته وخانتني دمعته، فرصة عمل في الخليج، وأنا من البداية في الغربة بتحمل، من جد وجد ومن زرع حصد، القرش الأبيض واليوم الأسود، أنا رايح فين؟ أنا راجع تاني، راجع مصر، مشربتش من نيلها، طب جربت تغنيلها، هكمل نص ديني، شوفولي عروسة تقدس الحياة الزوجية، ايد بنتك يا عمي، بنشتري راجل، امضي القايمة، شيك شاك شوك، مبروك، ولد، يتربى في عزك، مبروك، بنت، تتربى في عزك، ودارت الأيام، اتلم يا واد، ذاكري يا بت، جيل فاسد، فين أيام زمان، هو انتوا أيامكوا دي أيام، ودارت الأيام، جالك كلامي؟ جالك الضغط، جالك سكر، جالك عريس لبنتك، ليت الشباب يعود يومًا، يلا هناخد زمنا وزمن غيرنا؟ تبت إلى الله، وصيتك العيال يا منال، لكل أجل كتاب، البقية في حياتكم، العزاء بدار المناسبات، والبقاء لله، الله يرحمه كان راجل طيب.