= خطوة عزيزة .. نورت
– الله يحفظك
= عارف أنا قعدت القاعده دي قد ايه ؟
– بقالنا ييجي ساعه الحقيقة علي ما سابونا لوحدنا نتكلم شوية .. لو تحبي تقفي تفردي ضهرك شوية مفيش مشكلة
= قصدي قاعدة الخطوبة دي .. قعدتها كام مرة ؟
– لا الحقيقة مش عارف
= ولا أنا .. مبقتش قادرة أعد ولا أحصي
– ولا يهمك .. ان شاء الله المرادي كله هيبقي تمام وهتم علي خير .. وهتسمعينا أحلي زغروطة دلوقتي ؟
= زغروطة ؟! إنت مفكر إني ايه ؟!
– هي حاجة عيب ولا ايه
= متفتح ؟
– أفندم ؟
= انت متفتح ؟
– اه الحمد لله .. فاتح كذا سنترال كده في المنشية
= استغفر الله .. يا ابني متفتح ؟ أوبن مايندد ؟
– لا الحقيقة مفتحتش لسه مايندد لحد دلوقتي .. بس عادي لو عايزة مايندد أفتحلك واحد .. عندي محلين فاضين تحت امرك
= اتفضل قوم امشي
– في ايه
= اتفضل لو سمحت قوم اتكل
– ليه طيب في ايه ؟
= انا أوبن مايندد .. تقدر تقول استرونج اندبندنت وومان
– أنعم وأكرم .. ايه المشكلة
= المشكلة اننا لو هنتجوز وناخد الخطوة دي لازم تفهم اني ليا حياتي الشخصية الممنوع المساس بيها
– ماشي مفيش مشكلة .. المهم كلميني عنك
= أنا لست إمرأه كباقي النساء
– انتي ست الكل
= بطل يا عم الكلمات المنتهيه بتاع أفلام الستينات دي
– انتي كوشنتيفة قلبي
= حلو كده .. كنت بقول ايه ؟! .. آه .. انا لست إمرأه كباقي النساء .. انا لست شهرزاد الخائفة ولا بثينه العاشقة ولا ليلي الهادئة
– ولا سارة الطياره ؟! ولا عبير اللي بتطير ؟ اهههه
= انا لست طفلة .. ها ؟ لست طفلة أبصرت للتو .. ولا مراهقة تحاول إثبات نفسها .. ولا صبية مثلت دور الكبار
– ايوه انتي ايه ؟ كلبة بحر ؟
= انا لست مثل أمي
– هي أمك كلبة بحر ؟
= أنا لست مثل أمي ولا أشبه صفات أختي ولم أرث الطبع من جدتي
– انتوا عيلة قذرة شكلكوا
= انا لست كباقي النساء .. انا بداخلي روح مختلفة
– انا قولت كده والله .. ده مش كلام بني آدمه عادية .. انتي بداخلك روح فعلا .. أذكري الله طيب
= بداخلي روح مختلفة وقلبي لا يشبه أي قلب
– ولا كلب والله
= انا ايه بقي ؟
– البيضه الكامنه ؟!
= انا إمرأه عنواني ألا أركع لأي إنسان
– ونعم بالله .. ونعم بالله
= وانت بقي ؟
– لا انا هقوم أمشي
= تروح فين ؟
– همشي يا بثينة انتي ولا ليلي محدش عارف .. همشي .. هروح أشوفلي أمينه السليمة أو حاجة خفيفة كده تنفعلي
= وانا مالي
– مهو انا مش ناقص عيا يعني .. انا واحد عاوز اتجوز ارتاح ارجع الاقي لقمه وشكل نضيف وكلام يفتح النفس .. هتجوز واحدة بداخلها روح كامنه ليه بس هو أنا الخادم 9 حرام عليكي
= انا آسفه
– احنا هنقعد نشتغل ونشتري ونهلك نفسنا عشان نتحوز واحدة تقولي مبتركعش لأي انسان ؟ .. هو احنا هندوس يا بنتي ؟ ما كلنا مبنركعش غير لله عادي يعني مش ميزه
= عندك حق والله ..
– انتي بتطبخي ؟
= كل حاجة والله .. شم البادي كده ؟! كله ريحه تقلية وتوم وصلصة
– بتنضفي ؟
= لهلوبة أقسم بالله
– تعرفي تربي أطفال ؟
= اعتبرني خريجة رياض اطفال
– خلاص نهدي كده ونرجع واقعنا ومجتمعنا ونتلم عشان الدنيا تمشي
= عنيا الاتنين
– قولتيلي بداخلك ايه ؟
= ولا أي حاجة والله دول كلمتين حفظاهم .. انا بداخلي تيشرت نص كم مقطع عادي جدا
– اه كده .. مسمعش الكلام الهلامي المطلق اللي ملوش معني ده تاني
= كلام ايه ؟! انا نسيته اصلا خلاص اتمسح
– اتفقنا
= انده لماما تزغرط ؟! .. ولا أزغرط أنا ؟