تعريف الوطن

* هل هو المكان اللي اتربيت فيه؟ .. انا مثلا اتربيت برا مصر و ذكريات طفولتي كلها برا مصر ..

* هل عشان أبويا و أمي مصريين فلازم أنا بالضرورة أعتبر مصر وطني؟ .. و لا عشان جدودي عاشوا على الأرض دي مئات السنين و ماتوا فيها فانا لازم أبقى زيهم! .. طب و انا مالي اصلا بيهم! .. دا أنا بالكاد شفت جدي الأول .. و حتى لو شفتهم كلهم فهما حرين يعتبروها وطنهم .. انما انا احب اللي بيحبوه ليه؟

* طب يمكن عشان جنسيتي اللي في الباسبور؟ .. بس حتى دي ممكن يبقى عندي منها كتير ..

* و لا يمكن عشان اللغة؟ .. اللهجة؟ .. طب مانا باتكلم لغات تانية !!

* ممكن عشان اللي حواليا في وطني هم من نفس جلدي .. و لوني .. ولاد عمي و ولاد خالي و عيلتي و قبيلتي و عِرقي .. بس الحقيقة اني ماشفتش نص ولاد عمي بقالي سنين .. فمش فارقه ..

* طب هل الوطن هو الأرض؟ .. التراب يعني؟ .. بس لو كده يبقى يفرق ايه تراب من تراب؟ .. يمكن الجو؟ انا مثلا طول عمري عايش في بلاد حارة .. هل ممكن يبقى وطني بلد ساقعة؟؟ .. مش عارف!

* مش يمكن التاريخ و الذكريات! .. النوستالجيا و الأغاني و رمضان و القهاوي و الفول و الفلافل و الجو ده؟؟ .. بصراحة الكلام ده بقى موجود في كل حته .. حتى الناس اللي استوطنت برا مصر بيرجعوا يقضوا رمضان في مصر زي ما أي سايح أجنبي بيجي مصر شهر ..

* يمكن الدين طيب؟ .. يعني مثلا واحد مسلم مش حيعرف يعتبر بلد مافيهاش جوامع و أكل حلال بلده .. بس الحقيقة الدنيا كلها بقى فيها جوامع و أكل حلال .. دانا في لندن لما بتحضرني الصلاة في الشارع بادور على جوجل مابس الاقي جامع كل شارعين اروح داخل مصلي .. دا غير ان وطني بالفعل مش بس الناس اللي على ديني!

* يمكن خوفي اني ابقى مواطن من الدرجة التانية في الوطن الجديد! .. بس انا بالفعل مواطن من الدرجة التالتة في وطني القديم ..

* يمكن يكون الوطن هو اللي باشوف فيه نفسي في وش كل واحد ماشي في الشارع ؟! .. لا يا عم .. أنا محترم و البلد اتملت ناس مش محترمة .. من أول الظلمة لحد السوقة و الدهماء .. انت بتضحك على نفسك .. الوطن مش الناس اللي شبهك

* يبقى الوطن هو المكان اللي دايما باشتاق اليه و انا بعيد عنه .. زي الطفل اللي مش قادر يبات بعيد عن مامته .. بس يا ترى الشوق كفاية ؟ و يا ترى انا باشتاق لمكان واحد بس؟

* طب و ليه ما يكونش الوطن هو المكان اللي فيه الضعيف اللي محتاج نصرتك .. الفقير اللي محتاج معونتك .. الظالم اللي محتاج وقفتك قصاده ؟؟ .. لا .. أنا حاروح ابني مع اللي بيبنوا في السيليكون فالي ..

* طب ما ينفعش الوطن يبقى هو المكان اللي نفسي اتدفن فيه بعد ما أموت؟ .. و هو دا يبقى وطن!! .. دا يبقى قبر حضرتك!

يبدو لي ان الوطن مالوش تعريف .. هو ببساطة كل حاجة قلبي مصدقها و عقلي المهزوم مكدبها .. هو ما استوطنني .. لا ما استوطنته ..

https://www.facebook.com/photo.php?fbid=10156139479324203&set=a.10150821738454203.481933.676439202&type=3&theater