?١٠٠٠ سنة الناس كلها بتتعلم في الأزهر ..
?الاحتلال الانجليزي في أواخر القرن ال ١٩ .. ظهور التعليم الأهلي .. مدارس حكومة و مدارس أجنبي .. الناس تبدأ تدخل عيالها المدارس الأهلية بس الأغلبية بتروح مدارس حكومة (عربي) .. ببساطة لان احنا عرب!
?الهزائم العسكرية المتلاحقة .. الحروب العالمية اللي مالناش فيها لا ناقة و لا جمل .. حرب ٤٨ .. حرب ٥٦ .. حرب ٦٧ .. الاستنزاف .. ورا بعضو ورا بعضو .. و حتى نصر ٧٣ تلاه احتلال ثقافي أمريكي على نطاق واسع .. فتزيد أعداد الناس اللي بتحب الغرب “المنتصر” “الراقي” .. و تكره الوطن “المنهزم” “المتأخر” .. فتزيد بدورها أعداد اللي بيدخلوا مدارس أجنبي ..
?الرئيس الحكيم يطلع يشتكي من ازدياد أعداد السكان .. و انه مش عارف يأكلنا منين .. فالفصل يبقى فيه ١٠٠ طفل .. و عشان البلد فقيرة فالمدرس مرتبه صغير فيقوم يضغط ع العيال عشان ياخدوا دروس .. فالمقتدر بقى يحاول يدخل عياله مدارس أجنبي .. و الفقير بقى يطلعهم م التعليم ..
?على أواخر الألفية التانية الطبقة الوسطى بقت أغلبيتها بتتعلم في مدارس أجنبي .. و الطبقة فوق المتوسطة و العليا دول بيكلموا ولادهم انجليزي و فرنساوي في البيت .. و لو نطقوا عربي يبقوا وحشين .. إلا من رحم ربي
?آخر ٢٠ سنة الطلب ع المدارس الأجنبي يزيد .. فالبيزنس ياخد باله .. مليون مدرسة خاصة تفتح .. منهم مدارس اوضه و صاله و بيدرسوا الطفل اللي في أولى ابتدائي انجليزي و فرنساوي و ألماني .. و نبدأ نسمع مصطلحات زي “منتسوري” و “SAT” و “IB” و غيرهم ..
?آخر كام سنة المدارس الناشيونال تبقى عيب .. و النضافة و العلم في الانترناشيونال .. بس يا ترى أي نظام؟ SAT و لا IGCSE و لا IB و لا STEM و لا الياباني اللي طالع جديد؟ و لا Home Schooling ؟
.
.
يحضرني ان قريش في الجاهلية كانت بتخاف على عيالها من تغير فصاحتهم بسبب اختلاطهم بالحجاج العرب اللي ليهم لهجات تانية أو أقل فصاحة .. فكانت بتربي أطفالها في البادية بعيدا عن أخلاط المدن .. و يحضرني أيضا “سفيان الثوري” اللي اتولد في “خراسان” في بلاد فارس فأبوه خاف عليه من “العُجمة” و ان لغته العربية تتأثر .. فرجعه الكوفة بسرعة ..
.
.
و احنا لسه بنلهث ورا اللغة الأجنبية بعيدا عن الهدف من استخدامها
(ثقافة المنهزم)
https://www.facebook.com/omara007/posts/10157264300549203