تاني حرية ..
العام عام .. والشخصي شخصي.. سهلة والله يا جماعة. مافيش ابسط ولا أسهل من كده بس احنا اللي لازم نخلط كله ببعضه ونقلبها مليطة.
الشخصي ده في بيتي مع نفسي .. مافيش أي مخلوق ليه الحق في إنه يتجسس عليا أو يتعدى على خصوصياتي ويشوفني بعمل ايه في بيتي إلا لو كنت خاطف عيل صغير بقى بعذبه مثلا ده موضوع تاني.
انا باكل ايه بشرب ايه نايم مع مين لابس ايه بعمل إيه ماحدش ليه دعوة دي حريتي الشخصية بتاعتي أنا لوحدي وبيني وبين ربنا.
وانا في بيتي بقى وبمارس حريتي ((الشخصية)) قمت فاتح لايف ع الفيسبوك ومفرجها لكل الناس، ايا كان اللي بعمله صح غلط حلو وحش حرام حلال اخلاقي او غير اخلاقي الخ .. هنا خلاص بقى شكرا مابقتش “شخصية” .. بقت موضوع “عام” .. من حق كل واحد هيشوف الفيديو او الصورة انه يعلق ويقول رأيه زي ماهو عايز .. واحد هيقول برافو والتاني هيقول يعععع والتالت هيقول اتفوووو على القرف اللي انت بتعمله والرابع هيقولي استمر وعايزين كل يوم من ده إلخ.
ماينفعش آجي لواحد كاتب “يعععع” و “اتفوووو” واهاجمه وأقول عليه متخلف ورجعي أو امنعه من التعليق .. انا بنفسي اللي اديته الحق في التعليق على حاجة شخصية (يمكن انا عايز كده بقى ومتنازل عن حقي في الخصوصية) فخلاص اصبح التعليق على حياتي الشخصية من حقه.
عايز تحافظ على حريتك “الشخصية” يبقى تلتزم بكونها “شخصية”
مش فارقة معاك وعايز تعرضها للناس يبقى لازم غصب عنك تقبل كل التعليقات السلبي منها والإيجابي.
حصل وكانت حرية “شخصية” وحد اتجسس عليك وصورها بدون علمك وطلعها للناس فدي بعتبرها جريمة ومهما كان فعلك ده لازم هدافع عنك.
———————
مثال : بتشم صوابع رجليك بالليل ؟ حلو .. حقك .. مع نفسك .. ممنوع حد يتجسس عليك في بيتك ويصورك ويفرج الناس ويقولهم الحقوا فلان بيشم في صوابع رجليه .. لو حصل كده انت مظلوم ودي جريمة في حقك .. لو انت صورت نفسك وانت بتشم في صوابع رجليك ونشرتها يبقى من حق أي واحد يخش يكتبلك : ايه القرف ده ؟؟؟ .. ومش من حق حد يعارضه لا انت ولا المدافعين عنك وبيطبلولك. أقصى حاجة تقدر تعملها انك تمسح التعليق ده من عندك لكن لازم تعرف انه هيفضل يتقال في كل مكان ولو ده مضايقك قوي يبقى مكنتش تصور من الأول وتعرض حاجة من حياتك الشخصية على الناس.
خصلت ؟
بس كده.
https://www.facebook.com/Dr.AshrafHamdi2/posts/426617491029241