بيتشد لنوع مختلف من الجمال

كل ما بينضج الانسان كل ما بيبتدي يتشد لنوع مختلف من الجمال ..
..مش الجمال اللي بيشد العين او يخطف العقل اول ما تشوفه ..مش البديهي المألوف اللي كتير بيتفقوا عليه .. مش الصادم اللحظي اللي مع الوقت تلاقيك اتعودت عليه و فقد عنصر ابهاره .. انما الجمال الحقيقي اللي بيلمس روحك و يدخل جواك بشكل انتا مش قادر تفهم ازاي و امتي .. بتلاقي نفسك في تجربة فريدة و شخصية جداا قصاده .. فبالرغم من كتير ممكن يمروا عليه و ميفهموش سر السحر اللي فيه ، انتا بتكون متيقن واثق بعظمة و ابداع الجمال ده .. لدرجة انه بيتحول لجزء منك و من ادراكاتك .. و المدهش انك لما بتدوقه مرة مش بتقدر تستطعم اي جمال سطحي او مزيف تاني ..
ساعتها بتبقي بتستعجب علي الناس المبهورة بالقشور و الفتات علي اساس انها رموز الجمال العالمي !! … و ده اللي بينعكس عندهم انك شخص كئيب او نكدي ، ازاي معندكش الاندهاش المفتعل بالتافهات و المؤثرات المبتذلة بتاعتهم !! انتا اكيد مريض او مش طبيعي .. مش قادرين يوصلوا ان حتي في الحزن فيه جمال .. في العزلة فيه جمال .. في الضعف و الانكسار فيه ارق جمال !! ..فكل ما قربت من النفس البشرية و تواصلت مع وجودها الحقيقي من غير تصنع او ادعاء كل ما لمست جوهر الجمال ..
.. فمفيش اجمل من الحقيقة في ابسط صورها … حتي و لو كانت علي شكل لون اسود صريح … صادق في وضوحه .. و عميق في حضوره ..