بعيدا بقى عن الألش على بيومي فؤاد علشان طالع في كل حاجة
من معرفتي البسيطة بقصته انه كان في فنون جميلة و كان بيمثل مسرح اثناء الجامعه و بعدين دخل مجال الاعلانات و في الاخر رجع للتمثيل مؤخرا و حاليا سنه 51 سنة
اعتقد (و ده تحليل مش مبني على حقائق) انه الراجل تنازل عن حبه الاساسي في بداية حياته علشان الاستقرار الوظيفي و فضل الموضوع جواه و فضل خايف من المخاطرة و لغاية لما جاتله فرصه لما كبر و طبعا هو فعلا موهوب و من النوع اللى ممكن يضحكك بدون ما تحس انه بيبذل اي مجهود و لما جاتله الفرصة دي استغلها و بعدها الدنيا اتفتحت قدامه فبقى زي الجعان اللى عايز يعوض بعد صيام طويل ، مع انه قادر يقبل ادوار اقل و يخفف على نفسه الشغل لكن شعور ان الزمن جري و انه عايز يلحق يعمل حاجة بعد ما ضيع وقت طويل بيدفعه انه يفحت نفسه.
اللى بيلاقي حبه في اول حياته و يسيبه علشان الخوف و ضغوط المجتمع، بيتعب اوي لانه ولا بيقدر ينساه ولا بيقدر يروحله و المسافة بتبعد كل يوم ، فبلاش جوع و ندم بقى يا اخونا
https://www.facebook.com/IhabLSayed/posts/1753076488302629