التصنيفات
المدونة

اهم حاجتين هاينجحوك في شغلك في مصر

اهم حاجتين هاينجحوك في شغلك في مصر ..ممكن متلاقيهمش – علي الاقل بنفس القوة – في اي مكان تاني
١- ان العميل يشتريك انت “بشخصك” قبل ما يشتري انت هاتعمله ايه
العميل هنا ممكن يكون حد انت بتعمل شغل مؤقت او حتي دائم معاه
ممكن العميل يبقي مديرك او حتي زميلك في الشغل
ممكن العميل يبقي والدك/والدتك في البيت
ممكن يبقي اي حد بتتعامل معاه
لو الشخص دا اقتنع بكلامك، لقي الكلام مرتب، بتقوله في النص كلمتين انجليزي، بتستشهد بكام حاجة هو عارفها، بترد علي كل الاسئلة بثقة ..ساعتها هايقتنع بيك “كشخص” وهايبقي متقبل الخسارة والتجربة معاك.

٢- حط كل العوامل اللي تنجحك في الاول ..كل الاحتمالات ..سخر كل امكانياتك في الاول
لازم اول حاجة يشوفها منك يبقي فيها انبهار ..لو انبهر هايبقي زي اللي كان في مكان ظلمة وانت ولعت نور جامد في وشه .. الانبهار ده هايخليه “قافل” عنيه فترة ..واقف مكانه مش قادر يتحرك ..مش بيفكر في حاجة غير في النور اللي ضرب في وشه .. ساعتها تقدر تجرب انت وتقيس كل العوامل اللي انت جربتها كل عامل لوحده وتشوف تأثيره ايه.

الكلام ده يعتبر نفس الشغل اللي بيحصل في اغلب الاماكن .. الفرق بس بيبقي في حاجتين:
اولا: العميل ده فاهم او مستعد يفهم ولا لا؟
ثانيا: انت واعي بالموضوع اللي بتعمله وبكل خطواته ولا بتخبط وانت نفسك مش فاهم؟