ال Social Media مش بتبني علاقات وهمي

ال Social Media مش بتبني علاقات وهمية ولا بتقطع التواصل بين الناس
ال Social Media بتبين وبتكشف حقيقة اي موضوع بسرعة.. بتوصل الموضوع لآخره بسهولة
انت ممكن يبقي في مجموعة أشخاص (صحابك، جيرانك او حتي قرايبك) مفيش بينك وبينهم اي “كيميا” .. مش مناسبين فكريا مع بعض..
من غير ال Social Media بتتقابلوا كل فترة ( الابتسامة اللطيفة، وأي سؤالين مع رد عليهم ب – الحمدلله- والموضوع بيخلص )
مبتعرفوش حاجة عن بعض، مأخذتوش الوقت الكافي علشان تتعرفوا علي فكر وشخصية بعض
ودا اللي بيحصل علي ال social media
بتشوفه كل شوية، بتعرف رأيه عن نفس الحاجات اللي بتحبها، بتشوف مدي الاختلاف او الاتفاق مع الأفكار والاراء والمعتقدات و وجهات النظر .. بتكون وجهة نظر كاملة .. حتي الحاجات الي اي شخص بينشرها وخلاص.. بتبين حاجات عنه “سواء” بإعجابه بيها او بسطحية شخصيته وانه عايز ينشر اي حاجة وخلاص
الحاجات دي كلها محتاجة وقت كبير واحتكاك بمواقف مستمرة علي طول مع الشخص علشان تكتشف ده .. الموضوع مش سلبي زي ما ناس كتير بتقول .. انا شخصيا أتعرفت علي ناس اونلاين قابلتهم بعد سنة او اكتر .. بس طول الفترة احنا اصحاب جدا .. حتي الناس اللي بيتقابلوا مرة او مرتين .. طالما في حاجات مشتركة بينهم بيفضلوا اصحاب .. الموضوع بينطبق حتي علي الأولاد الصغيرين اللي بيدمنوا الأجهزة التكنولوجية، سواء سمارت فون او تابلت او لابتوب او بلاي ستيشن… لو كانوا لقوا اهتمام واحتواء من الأهل بشكل ممتع زي الألعاب مكنوش ساب اهلهم وركزوا مع شاشات الأجهزة .. لو كانوا لقوا – علي الأقل – مشاركة من اهلهم كانوا الموضوع هايبقي عادي.
مترموش عيوبكم من قلة اهتمام وفقر أفكار وعدم الاهتمام علي اي حاجة ليها علاقة بالتكنولوجيا بشكل عام وال Social Media بشكل خاص .. لان كل ده في الاول وفي الاخر أدوات في ايدكم تتحكموا فيها او تبقوا جزء منها.