واحدة من اكبر مشاكل “عدم الوعي” بحالة الاحتياج اللي انت فيه …هو انك بتضيع علي نفسك فرص تانية كتيييير جدا لأنك مش بتبقي واعي ولا بتدور غير علي اَي حاجة تسد الاحتياج ده.
بمعني ان لو شخص كان مفتقد لجو الاسرة القريبة من بعضها، بيبقي عايز ينضم لأي “شلة/مجموعة” مع بعض …بغض النظر هاتبقي فين وهايبقوا بيعملوا ايه…هو عايز دي…ويفضل يلبس في مصايب وينخدع ٥٠٠ مرة ، وبرضه حتي لو ساب المجموعة دي هايدور علي مجموعة تانية،
ممكن في الطريق يبقابل “شخص” كويس، مبيخدش باله منه او بيتعامل معاه عادي…مع ان دا ممكن يبقي شخص كويس جدا..بس هو مبيشفش ده لانه بيدور علي “مجموعة “.
مثال تاني لما شخص يكون في احتياج لنصه التاني، بيفضل يقيس اَي شخص بيقع قدّامه/يتعرف عليه علي مقياس مواصفات “نصه التاني”…انت فيك ايه من مواصفات الأحلام اللي بدور عليها…فبيضيع منه ناس كتييييير كويسة كأصدقاء لأنهم مفهمش مواصفات “نصه التاني”.
الوعي بالاحتياج مش بيلغي الاحتياج، لكنه بيخليك قادر تشبع اجزاء من الاحتياج ده عن طريق ناس تانية مفهمش مواصفات الأحلام كلها بس فيهم ولو صفة واحدة…الصفة دي مش هاتشبع احتياجك ككل ولكن هاتخليك تتقل وتعرف تفكر ومتتدلقش علي اَي حد “تحس” فيه انه هو ده وتتخزوق فيه كالعادة
وفِي نفس الوقت هايخليلك الصورة أوضح ومش هاتضيع علي نفسك فرص/ناس كويسة هايسندوك في أوقات كتير لحد ما تلاقي
The One.