الميراث وتونس والفهلوة الإسلامية!
الناس اللي بتحاول تبرر ليه وراثة المرأة في القرآن نصف الرجل بموضوع “أصل في عشروميت حالة في الإسلام” الست فيها بتورث أكتر من الراجل بيضحكوا الناس عليهم..
الموضوع في منطق مدعي العلمانية مالوش علاقة بالعم والعمة والحسابات المعقدة في جدول المواريث في الشريعة الإسلامية..الموضوع بالنسبة ليهم بسيط: أخ وأخت أبوهم مات لازم يورثوا زي بعض لإن الست زيها زي الراجل..
فلما تقعد تتشقلب وتبرر مبررات مالهاش دعوة بموضوع القضية يبقا أنت بتسئ للقضية بتاعتك مش بتنصرها..
أومال ايه الموضوع؟
الموضوع ببساطة إن الإسلام “نظام”..نظام كامل متكامل..يا تاخده كله على بعضه يا تسيبه كله على بعضه…مش قراطيس تسجب القرطاس اللي يعجبك وتسيب القرطاس اللي شايفه مش ماشي على مزاجك
والمواريث وكل أحكام الشريعة الإسلامية مفصلة كنظام كامل للحياة..زيها زي النظام الرأسمالي مثلا..أو النظام الشيوعي.
يعني ما ينفعش تاخد حتة من دعائم نظام الشيوعي وتحاول تطبقها في النظام الرأسمالي وإلا هيبقى سمك لبن تمر هندي..
الإسلام نظام كرم المرأة..كرمها بجد..ولم يفرض عليها العمل..ولم يفرض عليها حتى الانفاق على زوجها..عايزة تشتغل براحتها وأهلا وسهلا..مش عايزة تشتغل برضه براحتها وأهلا وسهلا..ونفقتها في حالة غناها وفقرها ملزومة من المجتمع..سواء مجتمعها الصغير زي زوجها أو مجتمعها الكبير زي الدولة..
يعني في الدولة الإسلامية لو أنت راجل لازم تشتغل وملزم بالعمل..انما لو واحدة ست فمش ملزمة بالعمل (وفي فرق بين مش ملزمة وبين مش مسموح لها)..
طبعا ده مافيهوش حجر على المرأة ولا نيلة بل بالعكس..ده دلع ومكانة عالية للمرأة لأنها لو حبت تشتغل ويكون لها كارير وكسبت منه فلوس فهي حتى مش ملزمة بالانفاق على البيت حتى ولو جوزها فقير..ويكون ليها حساب في البنك جوزها مالوش صلاحية أنه يمد ايده عليه..
ولو عاوزة تقعد في البيت ومتشتغلش حتى لو مش متجوزة فبيت مال المسلمين في الدولة الإسلامية لازم ينفق على المرأة وما يقدرش حد يقولها قومي اشتغلي..
يعني عندها كل الخيارات وماعليهاش أي مسئوليات مادية سواء في حالة فقرها أو في حالة غناها والمجتمع والدولة مسئول عنها..
طبعا ده موضوع حساس وماحدش بيحب يتكلم فيه لحسن يتقال عليه رجعي وضد حقوق المرأة مع إنك لو فكرت فيه شوية هتلاقي مافيش مجتمع في تاريخ البشرية حرر المرأة من المسئوليات المادية وفي نفس الوقت اداها ذمة مالية مستقلة واداها حرية العمل لو أحبت زي النظام الإسلامي..
يعني فيه ملايين النساء في أمريكا طالع ميتينهم وعايشين بالكاد وبيجروا من شغلانة للتانية عشان المجتمع مش سائل فيها وسايبها تشتغل في المحلات وتخدم على زباين في المطاعم وهيا حامل ٩ أشهر عشان لو بطلت شغل يوم مش هتلاقي تاكل..
الساعة البيولوجية اللي هيا سنوات محدودة في حياة المرأة واللي هيا المفروض تكون أسعد سنوات المرأة بتقضيها المرأة الغربية في ضغط عصبي شديد لهثا وراء لقمة العيش..
والله ياريت الرجالة يحصلوا على ربع اللي المرأة بتحصل عليه في النظام الإسلامي..ياريت الراجل يكون حر: إذا اشتغل فلوسه ليه مش لعيلته وإذا أنتخ مراته تصرف عليه ولو مش متجوز الدولة تصرف عليه!
عشان كده: الإسلام فيه عدل وماينفعش يساوي بين كائن حي وظيفته أنه يشتغل ويصرف وبين كائن حي مش مطلوب منه يشتغل واذا اشتغل ففلوسه ليه مش لغيره..فكر فيها بغض النظر عن جنس الكائن ده هتلاقيها منطقية حتى لو مش مسلم..
دلوقتي بقا: حاجة من الاتنين: يا تطبقوا النظام الإسلامي كله وتضمنوا للمرأة معيشة كريمة لو قررت ما تشتغلش بدون ما حد يذلها أو يمنعها من الشغل لو أرادت ويكون لها ذمة مالية مستقلة..يا تطبقوا النظام الرأسمالي اللي بيقول للست الحامل ما فيش حاجة اسمها حامل يا تشتغلي يا تموتي من الجوع..
يا إما النظام الإسلامي كله بمواريثه باقتصاده بسلطاته وبابا غنوغه با إما النظام الرأسمالي كله أو الاشتراكي كله..
إنما تاخد حتة مواريث إسلامية على حتة ثقافة مجتمع رأسمالي عاوز المرأة تشتغل زي الحمار على حتة مجتمع اشتراكي على حتة صوفية وتسمي ده نظام..لا يا حبيبي العيب مش المواريث..العيب أنك مش فاهم النظام!
https://www.facebook.com/FreedomInAction/posts/2329648567063715