التصنيفات
مقالات الضيوف

العالم كله بيتكلم عن محمد صلاح

لو أنا جزء كبير من حياتي باتفرج فيه على ماتشات كورة وعلى دوري مصري وإنجليزي وأسباني، وبتابع فيه صفحات الفرق عالفسبوك، وبشوف فيه كل ماتشات محمد صلاح، حيكون طبيعي جداً إن مخي يصور لي إن العالم كله بيتكلم عن محمد صلاح، وإن محمد صلاح دخل كل بيت في إنجلترا، وإن الــ approval اللي أنا مستنيه من العالم الأول أخيراً حيجيلي على إيد محمد صلاح، وحشعر بالفخر عشان العالم أخيراً عرف قيمة المصريين الحقيقية بسبب محمد صلاح.

وطبعاً مش حيكون عندي وقت أسأل نفسي: طيب هو أنا صورة دولة ساحل العاج اتغيرت في مخي لما كان دروجبا مكسر الدنيا؟ أو هل احترامي لدولة الكاميرون زاد بعد ما صامويل إيتو شرفها في برشلونة؟ أو يا ترى ليه فكرتي عن الدين المسيحي مش بيحصل لها أي تغيير كل ما أشوف ميسي بيصلب على صدره كل ما يجيب جول؟

إنما لو قعدت مع نفسي شوية، بعيد عن التلفزيون، و عن الفيسبوك، وحاولت للحظة أقتنع إن مصر مش محور العالم، حفهم إن مصر بالنسبة للمواطن الإنجليزي بالظبط زي ليبيريا بالنسبة لي، وإن مشجع الكورة الإنجليزي أهم حاجة بالنسبة له إن الرهان اللي عمله على الماتش يكسب، وإنه بيغني لمحمد صلاح زي ما أي مجنون كورة بيغني لأحسن لاعب في فريقه، وإن احترام العالم للمصريين مزدش ولا حاجة بسبب محمد صلاح

https://www.facebook.com/ramy.omar.hassan/posts/386711825160865