الحقيقة حول Cairo Ad School ومديرتها ايناس رشوان.
الكلام اللي انا هقوله ده تجربتي الشخصيه وتجربة ناس كتير راحت المكان ده وآمنت بالفكره وتحمسوا انه ينقلوا خبرتهم ويعلموا ناس تانيه أو حتي يقابلوا مواهب جديده بالذات ان كلنا نعاني من نقص الكوادر في سوق العمل في جميع المجالات.ولنفس السبب احنا اتجمعنا النهارده علشان نحذر الطلبه اللي بيتضحك عليهم و أيضاً المدرسين من غير ما يعرفوا ان بيتم استخدامهم للنصب علي الطلبه.
١. مديرة المدرسه بتختار ناس موثوق فيهم وعندهم علاقات قوية وأصحاب في مجال الدعايه والاعلان وبتطاردهم انهم يدرسوا عندها، وأول خطوة بعدها انها تبدأ تنزل صور وتعمل بيهم إعلانات وبعد تاني كورس (لما يكون الكورس سمع ونجح والناس عرفت انك بتدرس هناك) بتيجي في معاد المرتب المتفق عليه وتتصرف تصرفات غريبه جدا وتختفي وتصدر السكرتيره تقلك كلام غريب بردو و تقل أدبها، طبعا المدرس بيتخض من التصرفات المشبوهه الغير مبرره لأن محصلش اي خلاف وبيقرر ينسحب، يقوموا يكلموه بعد اسبوعين (الهو مع بداية الكورس التالت) وهمه مستغربين جدا انه مجاش يدرس وبالتالي مديرة المدرسه بتدخل تدرس بدل المدرس. وطبعا المدرس بيعتبر التجربه اتفه من انه يقف عندها أو انه يكون له أي رد فعل. بس مع تكرار التصرف مع معظم المدرسين اكتشفنا الكارثه:
٢. الكارثه انها بتكون عملت دعايه بأسمك، وللأسف الطلبه بيحضروا بعدها ويتفاجوا ان المدرس المعروف اللي كان بيدي المحاضرة مش موجود، وبيلاقوا مديرة المدرسه هي اللي بتدرس “آرت ديريكشن، ستراتيجيك بلانينج” وكورسات تانيه. فطبعا الطلبه مش بيروحوا تاني وفلوسهم بتروح عليهم. (مديرة المدرسه اللي بتدرس “آرت ديريكشن، ستراتيجيك بلانينج” وكورسات تانيه بتدعي انها كانت كرييتيف دايريكتور وبتدرس للطلبة رغم ان كل امكانيتها انها كانت جرافيك ديزاينر وبتدعي انها أخدت كورس ستراتيجيك بلانينج في ميامي اد سكول وفي قول آخر دارسه “آرت ديريكشن”. بالمناسبة هي مقتبسه الأسم والكورسات منهم وبتدعي انها تابعه ليهم وهي طبعا ملهاش أي علاقه بيهم.) أنا كمان أتحدي أن يكون في حد في المجال يعرفها شخصيا أو قابلها في أي شغل أو في أي شركه. معظمنا بقاله ٢٠ سنه في المجال وعمره ما سمع حتي عن حد يعرفها في المجال.
٣. هي مش بس بتستغل اسمك انها تجيب طلبه وتدرسلهم هي علشان توفر مبالغ المرتبات وتحقق مكاسب ماديه اكبر ، هي كمان بتستغل اسمك انها تجيب ناس تانيه تدرس كورسات تانيه علي حس ان فلان الفلاني معاها وكمان تعمل معاهم نفس القصة مرة تانية.
انا من وقت ما نزلت البوست الأول وتليفوني مبطلش رن، وده مثال من الناس اللي كلموني:
١. طالبه راحت تدرس “ستراتيجيك بلانينج” لقت مديرة المدرسه هي اللي بتدرس فطبعاً حضرت مرتين وبعتت للمدرسه تشتكي وتطلب استرجاع فلوسها ووعودها انه هيتم تعويضها، وطبعاً لا شئ.
٢. طالب راح يدرس”آرت ديريكشن” و “تصوير” بردو لقي مديرة المدرسه هي البتدرس ”آرت ديريكشن” و كورس “التصوير” لقي المحاضر حد عنده سنتين خبره فحضر بردو مرتين ومشي ولما اشتكي وطالب بفلوسه قالو هيتم تعويضك، وطبعاً لا شئ.
٣. علي الأقل ٥ مدرسين حصل معاهم نفس السيناريو بالظبط وطبعا بعد ما بيمشوا بتقول انها مجددتش الاتفاق معاهم لانهم غير ملتزمين.
٤. بنت كانت بتشتغل في المدرسه ومشيت لانها حست انها بتستغل للنصب علي الطلبه والمدرسين وطبعا طول الوقت مكنتش بتاخد مرتبها بحجة ان المدرسه عندها ازمه ماليه وانها شريكة نجاح ولما المدرسه تقف علي رجليها هيعوضوها أيضا والبنت صدقت وأمنت بالفكره ولكن بعد ما اكتشفت كم المخالفات مشيت ومخدتش فلوسها ومتكلمتش.
٥. ولد ساب شغله في بنك وراح يشتغل في المدرسه لانه كان عايز يغير من تخصصه للدعايه والإعلان وافتكر ان المدرسه احسن مكان يبدأ منه علشان هيتعلم وهياخد خبرة، بس بحكم شغله في البنوك اكتشف مخالفات مالية وقانونية كتير وهو شخصيا كان حيتورط بسببها فقدم استقالته وبردو مخدش فلوسه (الولد حاليا ماشي في الإجراءات القانونيه لمحاسبة المسئول واعفائه شخصيا من المسئوليه القانونيه)
طبعا بعد ما حطيت اول بوست مديرة المدرسه حاولت تساومني انها تدفعلي الفلوس اللي ليا عندها في مقابل اني اسكت وامسح البوست، فبالتالي قررت انا ومجموعة من الزملاء اللي درسوا هناك نوقف الجمعية الدايرة دي…، ونحذر المدرسيين اللي عارفين ان مش فارق معاهم أنهم ميخدوش فلوسهم وكتير مننا كانوا بيروحوا بدون مقابل، بس لازم يا جماعة يفرق معاكم انكم بتستغلوا في النصب علي طلبه بيدفعوا أرقام كبيره وهم فاكرين أنهم رايحين مكان محترم علشان يتعلموا منكم وبعدين يتفاجؤا بمديرة المدرسة هي الجوكر اللي بيلعب كل الأدوار ويدرس اغلب المواد.
تنبيه هام للمدرسة وتأكيداً للأنذار الرسمي المرسل : ممنوع منعا باتا استخدام أسمي أو صورتي في الترويج للمدرسة سواء علي مواقع التواصل الاجتماعي، أو أي منشورات أو من خلال البريد الإلكتروني أو حتي ذكر أسمي في أي شيء له علاقه بالمدرسة أو بمديرتها ايناس رشوان.