اعزائي طلاب الstudent activity، منظمي الevents، وطلاب الجامعات بشكل عام،
ركزا في الكلمتين الي جايين دول بشكل كبير، انا عارف اني محط اهتمامكم هذه الفتره خصوصا انه لا يخلوا يوم الا وحد منكم بيكلمني عشان عايزين في event هيقام قريب في الجامعه عندكم
في البداية، انا فعلا بشكركم وبقدر جدا حبكم واحترامكم، دي نعمة من عند ربنا لا تحصى ولا تعد ولو قعدت اشكره عليها الى مماتي لن اوفيها حقها
حبكم ورغبتكم اني اكون معاكم دي حاجه مشرفه جدا
ولكن،
في وقت معين كده في حياتي “الي هي مش طويله اوي بالمناسبه” وخاصة بعد بضعه احداث حصلت في حياتي
كنت فاكر اني عندي علم غزير وحكمه لا منتهيه، وقدر من العبقريه كانت تخليني اتخيل ديما اني قاعد وبلقي حكمي وخبراتي في الحياة على الناس..وكنت بحكي واكتب مقالات وما شابه الى ذلك، وكنت فاكر اني اوتيت من العلم كثير
مع الوقت وكل ما بنضج، كل ما بدرك اكتر انا قد ايه جاهل، وانا قد ايه كنت فاكر نفسي عارف حاجه وطلعت مش عارف حاجه
انا في الاصل صانع محتوى بشكل عام، وصناعه المحتوى حرفه، وحرفه صعبه مش سهله زي ما الناس معتقده، وعشان استمر على الحرفه دي بواجه مشاكل وصعوبات كتير جدا
منها ، رحلات التأمل الفلسفيه مع النفس ومع الحياة، الي هي ديما بترجعني الى اني اسكت واتعلم واسمع اكتر، واعرف انا قد ايه جاهل وقد ايه معرفش حاجه لسه
زمان لما كنت اطلب في ايفينت كنت اقول “انا هروح افيد الناس دي، انا هروح اقولهم حاجه تنفعهم، هروح انورهم”
دلوقتي بعد ما اتضحت ليا رؤيتي في معلوماتي وجهلي، اكتشفت اني بقيت اخاف جدا من الكلمه الي بتتقال، اخاف اكون بنشر جهلى عالناس وعشان عندي قدره بإقناع قليل من الناس انهم يتأثروا بهذا الجهل ويتبعوه
انا لغايه النهارده معرفش الصح من الغلط فين، معرفش ايه فلسفه الحياه الصحيحه وتقريبا مش هوصلها، بس انا لست مؤهلا اني انصح حد واخليه يتبعني او ياخد كلام مفيد يعمل بيه بشكل عام في الحياة
ممكن في صناعه المحتوى اه عندي شويه معلومات حلوه،
انما لما يجوا طلاب يقلولي تعالى “motvational speaker” اجي ا موتوفيت الناس يعملوا ايه ؟
انا لو اعرف اقولهم على طول، انما الكلمه الي ممكن اقولها وحد يتبعها ممكن تودي حد في داهية، انا اي حاجه بعملها بحاول اتقي ربنا فيها قدر الامكان وحاجات كتير بتتلغي وحاجات كتير مبطلعهاش عشان الشكوك دي،
انا عارف ان معظمكم بيبقى عايز ينظم ايفنت ناجح ويجيب حد ناس كتير متابعاه او ما شابه، بس الي بتعملوه ده بشكل كبير خطير، لان في ناس ما زالت عندها اشخاص قدوه، ومازالوا ممكن يتبعوهم وممكن يبوظولهم حياتهم
فتجنبوني انا في موضوع الموتيفيشن وموضوع اني ادي خطاب للطلبه، انا ما زلت بتأمل في الحياة وبطلع منها حاجات جايز تفيدني، انا مش مثال يحتذى به حتى الان الا في حتت معينه صغيره اوي متخصش معظم الناس وكمان لغايه دلوقتي مش مؤكد هفضل مكمل نجاح فيها ولا لا،
اتمنى ان يوصلكم الرساله دي وتعفوني من معظم الايفنتات، حتى لو لقيتوني بروح جامعه ولا اتنين، بيبقى نوع من انواع التواصل مع المجتمع بشكل عام لاني شخص منعزل شويه، مش معناها ان الجامعه دي احسن منكم او حاجه
وفي العاده ببقى رايح اتكلم في صناعه محتوى مش موتيفيشن ولا حاجه
شكرا، وادام الله روحكم الجميله واتمنى انها متتصدمش بصخره الواقع بعد التخرج كالعاده، وتفضل مكمله
https://www.facebook.com/iHesham/posts/10160089853890335