مفيش لفظ “طاعة” أو “رضا” الوالدين اتذكر (بشكل مطلق)* لا في القرآن ولا في السنة الصحيحة …. على عكس ما يظن أغلب الناس
الألفاظ المذكورة فعلا هي “البر” و”الإحسان” فقط
ودا معناه إنك مش مطالب “بطاعة” الوالدين طاعة “كاملة” أصلا … ولا مطالب إنهم يكونوا “راضيين” عنك … إنما إنت مطالب “بالإحسان” ليهم “والبر” بيهم بس
وياما كوارث كتير حصلت وحياة ناس كتير اتدمرت بسبب سوء الفهم دا …
زي مثلا:
_ ياما ناس اختاروا تخصص أو شغل مش حابينه لمجرد إرضاء أهلهم وفشلوا فيه وعاشوا تعساء
_ ياما ناس اضطروا يتجوزوا جوازات مش عاوزينها (أو ميتجوزوش ناس بيحبوهم) عشان يرضوا أهاليهم وعاشوا حياة تعيسة بسبب كدا
_ ياما ناس اتخلوا عن مواهب أو هوايات محترمة لمجرد إرضاء أهاليهم
_ ياما بيوت خربت بسبب إن الزوج بيسمح لأهله يتدخلوا في حياته الزوجية بينه وبين مراته وبقى هفأ دلدول يسيب أهله يتحكموا في مراته بحجة طاعة الوالدين !!!!!
كل دا مش صح ومش من الدين على عكس ما يتصور أغلب الناس…
إنما المصطلحات الموجودة في الدين هي “البر” أو “الإحسان” للوالدين
و”البر” مصطلح له معنى مختلف عن مصطلح “الطاعة”
والإحسان والبر بمعنى : الكلام معاهم بأسلوب حلو وخدمتهم وتنفيذ أوامرهم وطلباتهم فيما يخص”حياتهم” هما فقط زي مثلا : أكلهم … شربهم … علاجهم … مشاويرهم … مشاكلهم العائلية والاجتماعية …. الخ
(يعني البر عبارة عن طاعة “جزئية” فيما يخص منافعهم وليست طاعة مطلقة)
وبالتالي مش واجب سماع كلامهم فيما يخص حياتك الشخصية زي : شغلك…. تخصصك… اختيار زوجتك … طريقة حياتك … حياتك الزوجية … الخ
ولو طلبوا منك حاجة تخص حياتك ومعملتهاش فانت مش عاق ولا حاجة ولا حرام
طبعا بس من غير تجاوز في الكلام أو خشونة قدر الإمكان
**بالمناسبة دا كلام علماء المسلمين قديما وحديثا مش مألفه يعني من دماغي واللي مش عارف نجيبله المصادر لو حابب
واللي عاوز يتناقش بهدوء تحت أمره
#بر_مش_طاعة
#أسطورة_طاعة_الوالدين
تحديث:
حديث (رِضَا اللَّهِ فِي رِضَا الْوَالِدَيْنِ، وَسَخَطُ اللَّهِ فِي سَخَطِ الْوَالِدَيْنِ) خلاصة البحث فيه إنه حديث ضعيف غير ثابت على حسب كلام كتير من علماء الحديث …
*تحديث 2
الطاعة المقصودة في البوست هيا الطاعة “المطلقة”
إنما الطاعة “الجزئية” اللي هيا مرتبطة بمنفعة ومصلحة شخصية للوالدين هي أصلا أساس البر والإحسان وجزء من مفهومه ..
** الباقي في التعليقات
https://www.facebook.com/mhmd.s.kamel/posts/10216602902198822
بوست آخر عن ظاهرة خدمة الزوجة لأهل زوجها وطاعتهم
https://m.facebook.com/story.php?story_fbid=10213539747701874&id=1047534604