من اول ما بتتولد وانت بتدور علي إثبات انك عايش.. الاثبات دا بيجي “من وجهة نظر الأغلبية” عن طريق انك تغير او تأثر في حاجة ، فبالتالي انت بتدور علي انك تبقي ناجح في حاجة علشان تقول انك مؤثر.
ونظرًا لان كل المعايير “مزدوجة وغير محايدة” فبتفشل في كل محاولاتك..
المحاولات دي بتبدأ لما بتتجاهل كلام “اغلب اللي حواليك” وبتسمع كلام اهلك وتحاول تبقي ناجح “بطريقتهم” فبتضيع احلي سنين عمرك في نظام تعليم كل اللي اتخرَّجوا منه معترفين بفشله.. بتحاول تصبر نفسك انك هاتبقي مختلف وهاتقدر تنجح وتعمل اختلاف.. بس للاسف مع الوقت بتفشل في النظام ده وبتجيب “درجة عالية” وبتختم فشلك في النهاية بشهادة مبتعرفش تعمل بيها اي حاجة غير انك تتقدم لواحدة اهلها معترفين بنفس شهادة الفشل.
بعد فترة بتحاول تثبت انك عايش عن طريق اي حاجة تتفاعل الناس معاك فيها .. فنلاقي ناس بتشتم علي طول ..بتحاول تعمل/تكتب اي حاجة علي مواقع التواصل الاجتماعي بحيث يتابعها ناس كتيير ويتفاعلوا وخلاص..او تلاقي ناس بتأييد شخص/ منظمة/كيان لمجرد ان في ناس كتيير بيعارضوها..بعيدا ان الشخص/الكيان ده صح او غلط..هو مجرد بيأيده بحيث يبقي مختلف عن الناس اللي بتعارض ده بحيث يثبت لنفسه انه عايش وناجح بدليل ان في ناس كتير “حقودين وشمتانين” فيه وبيعارضوه