مرة زمان كنت قاعد في جنينة على بحيرة جنيف بأكل سندويتش .. جه راجل عجوز بيتمشى و قعد جنبي .. حطيت سماعات ال MP3 في وداني .. لقيت الراجل بيخبط على كتفي و طلب مني بأدب اني اقفل المزيكا عشان كانت عالية .. اعتذرت له و قلت له مش قصدي … قال لي معقولة تتعمد تسمع مزيكا و انت ممكن تستمتع بالهدوء دا (كنا يوم السبت و الدنيا حوالين البحيرة أهدا بكتير من أيام الأسبوع )
معرفتش ارد عليه .. هزت راسي و سكت .. هو كمان ابتسم و سكت …
عدا قدمنا ولد و بنت .. أوائل العشرينات .. رجعوا طلبوا مني اصورهم ب كاميرا صغيرة مع نافورة البحيرة .. صورتهم .. وقفوا يكلموني دقيقتين انا منين و عاجباني جنيف ولا شايفها مملة .. و راحوا ل حال سبيلهم ..
الراجل ادور و سألني :
– انت متجوز ؟
انا: لا
الراجل: عندك صاحبة ؟
انا: لا
الراجل: اومال ما حاولتش تاخد نمرة البنت ليه ؟ ما عجبتكش
انا: لا هى حلوة بس اعمل كدا ازاي و هى مع صاحبها ؟
الراجل: و مين قال إنه صاحبها ؟؟
انا: واحدة ب تتمشى على البحيرة يوم الإجازة مع واحد و بتتصور معاه .. في فرصة كبيرة يكون صاحبها. ..
الراجل: هى و الولد عدوا قبلها ب ربع ساعة من ناحية البولفار هيلفيتيك .. و لما رجعوا عدوا تاني .. مين اللي وقف و سألك تصورهم؟
انا: هما الاتنين…
الراجل: لا .. هى اللي سألتك .. طيب مين فيهم اللي كان ب يضحك في الصورة ؟
انا: هما الاتنين برضه
الراجل: لا .. برضه هى .. هو مكانش فاهم بيتصوروا ليه ..
الاتنين من جنيف يعني اكيد اتصوروا هنا قبل كدا ..
طيب .. اكيد انت فاكر مين اللي سألك انت منين و اتعلمت فرنساوي فين ؟
انا: الاتنين .. و ارجوك ماتقولش البنت ..
الراجل: طبعا البنت .. و قالت لك اسمها ناتالي .. و انت لسبب معرفوش مقولتش اسمك ولا حاولت تاخد أي معلومة عنها
انا: ما اخدتش بالي …
الراجل: في فرص في الحياة مش ب تتعوض .. زي البنت دي .. عموما المرة الجاية لما تفتكر الموقف دا افتكرني .. انا اسمي فيليب
انا: و انا اسمي احم…….
فيليب (قاطعني): انت ح يفضل اسمك الراجل اللي ضيع ناتالي من أيده عند البحيرة !!!
# سيرة ذاتية بأقل قدر من الأكاذيب و الخجل
https://www.facebook.com/ahmed.h.ezzat.37/posts/10153163564637765