انا مش فاهم الناس اللي كل حاجة غلط تحصل في ام البلد يعلقوها على شماعة الاخلاق و التربية بتاعت الشعب !!!
هو مين اللي المفروض يربي الشعب ؟ امه ؟ و مين يربي امه ؟ امين امه ؟
لما تكون تربية الشعب هي مسئولية الشعب، عاملين ليه وزارة اسمها “التربية و التعليم”؟
و الشعب اللي مش متربي دا لما بيروح بلد تانية و يمشي زي الألف بيحصله ايه؟ بيستحضر فجأة في قسم الجوازات في المطار ذكرى جدته الكبيرة حتشبسوت و هي بتربي عيالها و يفتكر القيم اللي كانت مكتوبة على حجر رشيد و يقرر يمشي عليها؟
الحقيقة انه بيلتزم لما بيكون فيه قانون رادع و آليات تنفيذ على الارض لمعاقبة المخالف (ايا من كان) دون تفرقة .. واخدلي بالك يالي عامل من بنها؟ “دون تفرقة بقول.
بيلتزم لما يحس انه فيه نظام عادل يحافظ على الحقوق و لو مشي صح هايعرف يجيب حقه (و بسرعة) بنفس القانون اللي بيعاقبه لو خالف.
لو هي بالتربية المنزلية فقط كانوا لغوا القوانين و العقوبات في اليابان عشان هما شعب متربي في البيت و اخلاق الساموراي هي اللي ممشياه و مش محتاج قانون اصلا.
يا بيه و يا هانم لما تحبوا تربوا الشعب، ربوا اللي بيحكم الشعب الاول.
https://www.facebook.com/yasser.farouk66/posts/10153769043688336