الموقف الأول ..
إمبارح كنت راكب تاكسي ورايح الشغل على الساعة 10 وشوية والدنيا كانت زحمة بطريقة مش طبيعية (فضلت بتاع ساعة إلا شوية في مشورا اخره ربع ساعة) ..
المهم كنت قاعد برغي مع السواق – عنده 25 سنة – بنتكلم عن أحول البلد وطبعاً هو قرفان وطهقان ولسه متجوزش وكل الكلام دا .. المهم في وسط الكلام كان بيتكلم عن ربنا وبيقولي إنه بقاله فترة مضايق وحاسس بتأنيب الضمير لدرجة إن الكام سيجارة بتوع الحشيش – اللي بيشربها في الترب (المقابر يعني) – بقى يشربهم وهو قرفان ! ..
فضلت اسمعه وهو بيتكلم عن ربنا وقد ايه ربنا كريم معاه وبيرزقه وبيستره وهو برضه وحش وغرقان في الذنوب .. وبدأ يكلمني عن النار ولسع نفسه بالولاعة بعد ما ولع السيجارة وقالي شايف انا بس اللسعة دي وساعات مبنقدرش استحملها وببقى سايق بالعافية ما بالك بالنار ! ..
حاولت اني اقنعه نتكلم عن الجنة شوية بدل الرعب اللي عملهولي دا بس مفيش فايدة .. قعد يحكيلي مواقف وبلاوي هو بيعملها وإزاي ربنا كان بيستره وبيقف معاه وبيرزقه .. انا الحقيقة كنت مستغرب من إزاي هو بيستقبل الرسايل من ربنا كدا وشايفها – وفي كتير مننا ربنا بيبعتله رسايل كتير وهو ولا هنا – ..
أنا كنت منبهر الولد بيتكلم عن ربنا احسن من شيوخ كتير جداً .. وبدأ يقولي أنا عايز ابطل ومش عايز امشي في السكة دي .. وفعلاً بدأنا نحط انا وهو خطة قصيرة المدى علشان يبدأ يبطل ويرجع لربنا وربنا يهديه ..
أنا بحكيلكم القصة دي ليه؟
علشان في ناس كتير بتبص للناس اللي بتعمل معاصي “ظاهرة” على انهم كائنات عايزة الحرق وربنا ياخدهم مع إنك لو مجرد سمعت الناس دي وبدأت تتكلم معاهم بتلاقيهم احياناً كتير عارفين ربنا أكتر منك .. الناس مليانا خير (حتى لو مظهرهم او سلوكيتهم بتقول غير كدا) .. بس محتاجين حد ياخد بايديهم بالحكمة والموعظة الحسنة ويجادلهم بالتي هي أحسن (مش قصدي إني برنس وعملت كدا smile emoticon
على فكرة السواق بقى صاحبي وخدنا ارقام بعض .. ولما احب اتكلم عن ربنا هكلمه smile emoticon
#الكلمة_الطيبة
#لسه_في_امل
وادعوا الى سبيل ربك بالحكمة والموعظة الحسنة.
ولو كنت فظا غليظ القلب لانفضوا من حولك.
انك لا تهتدى من احببت ولكن الله يهدى من يشاء.
الخير فى وفى امتى الى يوم الدين
رسائل..رسائل..رسائل
انت بس اللى بتعاند
اقرأ الرسائل اللى بتتبعتلك هتلاقى ان #لسه_فى_امل