التصنيفات
المدونة

ما بين نظرتك للحياة ..وواقعك الافتراضى

ما بين الاحداث الكتيير اللى بتحصل فى البلد ..و رد الفعل من القلييييييل جدا ..مقارنة بحجم النشاط الكبيييييير قوى على الانترنت

كلامى موجهه اكتر للفئة المكتئبة اللى شايفة انه مفيش امل فى البلد وكل كلامهم الاتى:

ان السعادة هى الخروج بره مصر بالاستناد الى جزء “التجارة بالدين” فى قوله تعالى:
رَبَّنَا أَخْرِجْنَا مِنْ هَـذِهِ الْقَرْيَةِ الظَّالِمِ أَهْلُهَا
انا مش فقيه دينى..بس لو تدبرت فى الاية..المفروض ان اللى قال كده الناس الصالحة اللى كانت بتعمل خير وبتسعى لاصلاح الارض واتمنعت..هما دول اللى يقولوا “ربنا اخرجنا” لكن حضرتك وحضرتك متستاهلوش تخرجوا منها اصلا ..انتوا اصلا مسعتوش فى الارض ومحاولتوش نعمروا فيها واتمنعتوا..ممكن تقولى حضرتكوا عملتوا ايه من تاريخ 11/2/2011 ..والمقصود هنا هو حدث مؤثر “غير انك تنزل تكنس الشارع وتدهن الرصيف والحاجات الحلوة دى” انت كل اللى بتعمله كتعمير “من وجهة نظرك” انك بتعمل “شير * الخير

..ناس كتيييير قوى مأخدتش اى خطوة على ارض الواقع فعليا ..كل اللى بيعمله انه كل ما يحصل حدث يقوم داخل على الفيسبوك ويعمل شير ..ويستنى العالم يتغير ..ويجى تانى يوم, ايه ده العالم متغيرش برضه, طيب شير كمان ..اليوم اللى بعده طيب شير وريتويت..
ودا بقى لو تاجرت معاك بالدين هاقولك
“إن اللَّهَ لا يُغَيِّرُ مَا بِقَوْمٍ حَتَّى يُغَيِّرُوا مَا بِأَنْفُسِهِمْ”..
احنا كان عندنا كم مشاكل غير طبيبعى والمفروض اننا قلنا اخدنا حريتنا وهانشتغل علي البلد ونطورها ..لكن كل اللى حضرتك عملته انك استنيت الحكومة والبلد لحد ما تغير من نفسها “او مثلا” ضميرك ضحك عليك وقالك انك بتشتغل وبتفيد بلدك وبتدفع ضرائب فبتعمر فى البلد” احب اقولك انك لو سافرت اى بلد من اللى انت نفسك تروحها ..هاتروح هناك وبرضه هاتشتغل وهاتدفع ضرائب اكتر من اللى بتدفعها هنا..انت المفروض عايز تغير كنت انت لازم تتغير.

يجيلك واحد يقولك وانا هاعمل ايه..انا مفيش فى ايدى حاجة + حته (تجارة بالدين)
” فأتوا منه ما استطعتم”
احد الدروس اللى حضرتها عرفت ان الاستطاعة مربوطة هنا بالقدرة..يعنى متجيش تقولى انا مش قادر اصلى جماعة فى الجامع “ما استطعتم” لا انت قادر ..انت بس مكسل او بتستعبط..زى ما كنت قادر وقت ما جتلك فرضة كويسة تنزل تطوع فى اى مكان تشارك فى بناء اى كيان تعلم وتتعلم لكن معملتش حاجة..فطبيعى جدا اللى بيحصل فيك دلوقتى.

طيب الناس اللى نزلت وعملت فعلا..وبرضه قاعدة مقهورة من الاحداث اللى بتحصل دلوقتى..هاخد من كلامكوا اللى انتوا بتنشروه كل ما حد يموت..ربنا اختار احسن ما فينا..انت فى الاول وفى الاخر بتعمل دا لربنا ..وانا احسب فيك انك عندك يقين فى قوله “إنا لا نضيع أجر من أحسن عملاً”
فانت محتاج تتعب شوية كمان معلش علشان تستاهل النتيجة.

بالمناسبة ..انا لامس الواقع كويس جدا ..انا بتبهدل فى المواصلات كل يوم بالذات فى المترو من ساعت ما قفلوا التحرير وبتفرم فى رمسيس..و بتعذب علشان اروح اقضى ورقة او حاجة من اى مصلحة وبيطلع عينى وممكن فى الاخر مخلصهاش ,كتير بينططوا علينا “البلطجية او الشرطة او الاتنين معا”..وانا برضه مش بلزمك انك تفضل فى مصر..انت لو مش فى دماغك مش مهم “حتة كمان تجارة بالدين” اننا مطلوب مننا التعمير فى الارض اه ..بس مش مطلوب اننا نعمر هنا “فى مصر”..ماشى ياعم انا هاعمل معاك اتفاق ..اشتغل على نفسك جامد قوى واتغير فعلا للاحسن يا اما ربنا يحققلك حلمك وتسافر بره البلد بس تبقى فعلا تستاهل انك تطلع بره “زى ما فى ناس عملت فعلا” او انك تبقى عندك حلم انك تغير فى المكان ده رغم كل الظروف “عن معرفة شخصية ببعض الناس عندهم الامكانيات يسافروا وهما اللى رافضين – هما لامسين الواقع برضه- بس دا حلمهم”.

لو اتكلمنا بشكل عملى كمان..انت المفروض تعمل حاجة ..بدل ما انت عمال تنشر حاجات مبتفرقش فى اى حاجة “ممكن اصلا” ميكونش حد متابع صفحتك و3/4 بوستاتك محدش بيشوفها ولا بيعلق عليها..غير كل فين وفين لما البوست بتاع الكئيب يروح لحد يقتل عنده اخر امل ..وان شاء الله ربنا هيحاسبك على كل كلامك وتأثيره على الناس خير الحساب.

دور على حاجة تعملها
عندك وقت زور ايتام..روح زور دور مسنين..ملكش فى ده ..اتبرع بشوية ملابس حتى ولو هاتروح انت تديها لحد او توديها لمكان هما يوصلوها..ممكن تتبرع بأكل للناس ..ممكن تدرس لو انت شاطر فى اى علم ..ملكش فى ده ممكن تدى محو امية..لو بتعرف تقرا ممكن تدى محو امية ..تعرف لغات ..ناس كتييير قوى محتاجة لغات..عندك دم ..اتبرع بيه..
المهم تعمل حاجة.

شخصيا قررت امسح اى حد من عندى مبينشرش غير حاجات كئيبة ينكد بيها على الناس وهو فعليا مبيتحركش ولا بيعمل حاجة…انشر زى ما انت عايز بس تكون بتطبق كلامك وبتتحرك بناء عليه..لكن قاعد عمال تعمل شير * الخير بس وحاجاتك
كلها كئيبة ..شكرا روح لامك.

مش معنى انك مكتئب وشاف الدنيا سودة ومفهاش امل انك تنكد على الناس..يا اخى خدها بمبدأ بشروا ولا تنفروا..انت مش مطلوب منك ان تغير الكون..انت بتجتهد وبتدعى ..الرسل نفسهم كانوا بيعملوا كده {وما نُرْسِلُ الْمُرْسَلِينَ إِلَّا مُبَشِّرِينَ وَمُنْذِرِينَ } مش انت اللى هتحاسب اللى مبيعملش او مبيشتغلش او حتى اللى بيفرح كل فترة وفترة علشان يقدر يكمل وكل ما يشوف خبر حلو بيفرح فرحة ولو جزئية احسن من اللى ليل نهار فى اكتئاب فطبيعى انه ميقدرش يعمل حاجة.

على فكرة نفس البلد اللى انت فيها وفى نفس الظروف اللى انت عايشها ..فى ناس عملت تقريبا “كل حاجة” انت بتقول مينفعش تتعمل ..
-فى 6 مصرين فازوا بجوائز انتل للعلوم 2013

-فى طالبة عندها 19 سنة صلوا عليها صلاة الغائب فى المسجد الأقصى وقام احد الاشخاص بعمرة بالنيابة عنها و ايضا فى يوم وفاتها كان هناك الالاف من الناس يصلون و يقرأون القران و يهبون ثواب ذلك لروحها وان يقام لها اكثر من عزاء و يحضر فى كل واحد منهم المئات و فى بعض الاحيان الالاف فى مصر وسوريا وفلسطين

-فى شركة ابتدت شغلها فى 2011 وفى ظل تدهور الاحداث قامت شركة انتل بشرائها فى 2013 ب 4 مليار.

لو انت مسمعتش عن الحاجات دى فدا جانب من تقصيرك فى انك مش بتسعى بجد.

الفكرة كلها لو بتجتهد فعلا ويتعمل اللى عليك وجايب اخرك افعال مش مجرد شير …
يقينا ربنا هايكرمك..د/مصطفى محمود قال ان لو فى واحد مؤمن وواحد كافر نزلوا البحر المؤمن اللى مبيعرفش يعوم هايغرق..والكافر اللى بيعرف يعوم هاينجوا.

حاجة اخير للناس اللى بتقول اليأس خيانة..انا اسف بس كلامك غلط ..
اليأس=كفر
“إِنَّهُ لاَ يَيْأَسُ مِن رَّوْحِ اللّهِ إِلاَّ الْقَوْمُ الْكَافِرُونَ ”

..ليه لانك ببساطة
(( لَا تَدْرِي لَعَلَّ اللَّهَ يُحْدِثُ بَعْدَ ذَلِكَ أَمْرًا )).

#لسه_فى_امل